Repaso di Skol di Ministerio Teokrátiko
Lo konsiderá e siguiente preguntanan na e Skol di Ministerio Teokrátiko durante e siman di 31 di desèmber 2007. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 5 di novèmber te ku 31 di desèmber 2007.
KUALIDAT DI PAPIA
1. Kua puntonan nos mester tene kuenta kuné pa nos konklushon ta efikas? [be-PA pág. 221 §1-4] Nos konklushon mester ta direktamente relashoná ku e tema di nos diskurso. Nos mester splika e ouditorio kiko nan mester hasi i animá nan pa hasié. Nos último frasenan mester tin un tono di konklushon, i tambe nan mester reflehá sinseridat i konvikshon.
2. Kon nos por hasi sigur ku loke nos ta bisa den sirbishi di vèlt ta eksakto? [be-PA pág. 223 §2-4] Promé ku nos sali den sirbishi di vèlt, nos mester pensa riba e tema ku nos ke bai papia di dje. Antisipá e posibel preguntanan ku e hendenan por hasi i prepará pa por duna kontestanan basá riba Beibel. Si un hende hasi nos un pregunta ku nos no ta prepará pa kontestá, nos no mester rei e kontesta. En bes di esei, nos mester investigá e asuntu i bai bèk pa duna e kontesta. (Pro. 15:28)
3. Kon nos partinan na reunion di kongregashon por mustra ku nos tin profundo rèspèt pa e echo ku e kongregashon ta un “pilar i sosten di e bèrdat”? (1 Tim. 3:15) [be-PA pág. 224 §1-4] Pa nos por defendé e bèrdat, ta masha importante pa nos kapta e sentido di e tekstonan bíbliko ku nos tin pensá di usa. Nos mester tene kuenta ku nan konteksto i ku ki intenshon a skirbi nan. Ademas, nos tin ku hasi bon uso di e instrumentonan pa studia ku e esklabo fiel i prudente a perkurá pa nos. Di e manera ei, nos por tin sigur ku nos presentashonnan ta basá riba “e ehèmpel di palabranan sano” ku ta bisto den e totalidat di bèrdatnan bíbliko. (2 Tim. 1:13)
4. Dikon ta importante pa kontrolá si e informashon ku nos ke usa ta konfiabel, i kon nos por hasi esei? [be-PA pág. 225 §1-2] Informashon ku no ta eksakto i informenan ku ta eksagerá sifra, alkanse òf gravedat di un asuntu ta pone nos pèrdè nos kredibilidat. Otro hende lo por ripití e informashon ku no ta eksakto i di e manera ei hasi e eror pió. Un manera pa hasi sigur ku estadístika-, susesonan aktual i notisia- òf eksperensianan ta eksakto ta dor di saka nan for di fuentenan konfiabel.
5. Ora nos ta siña otro hende, kon nos por hasi e informashon mas fásil pa nan komprondé? [be-PA pág. 226 §3–pág. 227 §2] Nos mes mester komprondé nos tema bon promé si nos ke hasié komprendibel pa otro hende. Ta mihó pa no trese yen di detaye padilanti ku ta innesesario pa nos oyentenan. Nos mester tuma tempu tambe pa lesa i splika tekstonan klave en bes di simplemente bula bai di un teksto bíbliko pa otro.
PARTI NUM. 1
6. Kiko ta proba ku e relato di Jonas ta outéntiko? [si-S pág. 153 §3] Hesus a referí na Jonas komo un persona real i a duna un splikashon inspirá di dos suseso profétiko di e buki di Jonas. Asina Hesus a mustra ku e buki ta kontené profesia berdadero. (Mat. 12:39-41; 16:4; Luk. 11:29-32) E hudiunan semper a inkluí e buki di Jonas entre nan bukinan kanóniko i a konsider’é komo históriko. Jonas su frankesa tambe ta un indikashon ku e relato ta basá riba bèrdat.
7. Kua profesia di Mikeas tin konekshon ku e gobernashon di e Reino di Dios den man di Kristu Hesus? [si-S pág. 158 §18] E nasementu di Hesus den Bètlehèm ta un kumplimentu di Mikeas 5:2. Ademas, e ta indiká tambe ku e konteksto di e versíkulo ei ta un profesia relashoná ku e Reino di Dios. Hesus ta esun ku ta sali for di Bètlehèm (Kas di Pan) ku benefisionan ku ta duna bida pa tur hende ku ehersé fe den su sakrifisio. Ta Hesus ta esun ku ta ‘pastoriá den e forsa di Yehova.’ I Hesus lo ta grandi i e lo trese pas asta te na e finnan di tera. (Mik. 5:4; Juan 6:33-40)
8. Ki prueba tin ku e buki di Habakuk ta inspirá pa Dios? [si-S pág. 161 §4] Apòstel Pablo a mustra ku el a rekonosé e profesia aki komo parti di e Skritura inspirá ora el a sita Habakuk 1:5 i a referí na dje komo algu ku “a wòrdu bisá den e Profetanan.” (Echo. 13:40, 41) Pablo a referí tambe vários biaha na e buki aki den su kartanan. (Rom. 1:17; Gal. 3:11; Heb. 10:38) Ademas, e kumplimentu di e deklarashonnan di Habakuk kontra Huda i Babilonia siguramente ta mustra ku Habakuk tabata un berdadero profeta di Yehova, den kende su nòmber i pa kende su gloria el a papia.
9. Pakiko nos por bisa ku pa aña 520 promé ku nos era, e hudiunan ainda no a kumpli ku e propósito di nan regreso for di eksilio? (Hag. 1:4) [si-S pág. 166 §3] Despues di 17 aña ku e hudiunan a regresá for di eksilio na Babilonia, ainda nan no a kompletá e trabou di rekonstrukshon di e tèmpel. Durante tur e añanan ei, nan a laga oposishon di enemigunan, nan propio apatia i materialismo stroba nan di rekonstruí e tèmpel. Asina nan a keda sin kumpli ku e propósito di nan regreso.
10. Na kua dia glorioso Zakarias ta referí bes tras bes? [si-S pág. 172 §26] E profeta ta ripití e ekspreshon “den e dia ei” 20 biaha. Un análisis di e manera ku Zakarias ta usa e ekspreshon aki, ta mustra ku esaki ta e dia ku Yehova lo kòrta kita e nòmbernan di e diosnan falsu i eliminá e profetanan falsu. (Zak. 13:2, 4) Ta e dia ku Yehova ta bringa kontra e nashonnan agresor i ta kousa konfushon meimei di nan segun ku e ta destruí nan. Ademas, esei ta e dia ku Yehova ta proveé ‘e vaye di su serunan’ komo un refugio pa su propio pueblo. (Zak. 12:8, 9; 14:1-5, 13)
LESAMENTU SEMANAL DI BEIBEL
11. Den ki sentido e profesia di Joel tokante un invashon di insekto a kumpli den e promé siglo i kon e ta kumpli awe? (Joel 2:1-10, 28) [w07-PA 1/11 “E Palabra di Yehova Ta Bibu—Puntonan Sobresaliente di e Buki di Joel i Amos”] Na Pentekòste di aña 33 di nos era, apòstel Pedro a sita for di e profesia di Joel i a apliká esei na e kristiannan ungí ku a kuminsá papia den lenga tokante e echonan poderoso di Dios. (Echo. 2:11, 16-20) Nan trabou di prediká den e promé siglo a tormentá e lidernan religioso falsu. (Echo. 5:17, 27-29) Di e mesun manera, nos trabou di prediká—ku ta enserá desenmaskará religion falsu—ta manera un plaga pa e lidernan religioso falsu.
12. Kiko “un makutu di fruta hechu” a nifiká? (Amos 8:1, 2) [w07-PA 1/11 “E Palabra di Yehova Ta Bibu—Puntonan Sobresaliente di e Buki di Joel i Amos”] E “makutu di fruta hechu” a nifiká ku e fin di e reino di dies tribu infiel di Israel tabata serka. Pasobra tabata piki fruta di zomer kasi na fin di e temporada di kosecha. E fin a bin en bèrdat na aña 740 promé ku nos era ora e asirionan a derotá Samaria, kasi un siglo despues ku Dios a inspirá Amos pa profetisá.
13. Den ki sentido Yehova a sinti duele òf a ‘repentí di e kalamidat ku el a deklará ku lo e trese riba e ninivitanan’ i ki efekto esei mester tin riba nos? (Jon. 3:10) [w03-PA 15/7 pág. 17-18] Yehova a sinti duele òf “a repentí” den e sentido ku el a kambia su manera di trata ku e ninivitanan, pasobra nan a kambia di nan kaminda. E normanan di Dios no a kambia, pero Yehova a kambia su desishon ora el a mira ku e ninivitanan a repentí. (Jon. 4:11) Yehova te ainda ta interesá den esnan ku no ta sirbié i e ta duna nan tempu pa repentí i asina nan ta evitá desaster den e binidero huisio di Yehova. Nos mester ta interesá pa spièrta e hendenan ei, meskos ku Jonas a spièrta e ninivitanan.
14. Kiko ta nifiká kana den e nòmber di Yehova? (Mik. 4:5) [w03-PA 15/8 pág. 17 §19] Kana den e nòmber di Yehova no ta nifiká djis bisa ku Yehova ta nos Dios. E ta nifiká mas ku djis partisipá den e reunionnan kristian i den e trabou di prediká e Reino, ounke e aktividatnan ei tambe ta vital. Ora nos ta kana den e nòmber di Yehova, nos ta dediká na dje i nos ta hasi esfuerso pa sirbié fielmente pa motibu di nos amor profundo p’e.
15. Na ki tempu i kon Yehova a bin na su “tèmpel” pa pronunsiá huisio den tempu moderno? (Mal. 3:1-3) [31 di des., re-PA pág. 32 kuadro; jd-S pág. 179 §3–pág. 181 §6] Tres aña i mei despues ku Hesus a ser ungí komo Rei designá, el a bin na e tèmpel literal na aña 33 di nos era i a saka e hendenan afó ku tabata hasi e tèmpel un kueba di ladron. Di mesun manera, komo e representante di Yehova, Hesus a bin na Yehova su tèmpel spiritual na 1918, tres aña i mei despues ku el a ser instalá komo Rei di e Reino selestial. Yehova a rechasá e lidernan religioso di kristiandat. Pasobra nan tabata parti di un sistema religioso ku ta kulpabel di dramamentu di sanger i prostitushon spiritual. Na e mesun tempu, Yehova a kuminsá sòru pa e purifikashon nesesario pa e kristiannan berdadero dor di purifiká nan adorashon, práktika- i doktrinanan.