Repaso di Skol di Ministerio Teokrátiko
Lo konsiderá e siguiente preguntanan na e Skol di Ministerio Teokrátiko durante e siman di 29 di òktober 2007. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 3 di sèptèmber te ku 29 di òktober 2007.
KUALIDAT DI PAPIA
1. Dikon ripitishon ta un método di siñansa importante? [be-PA pág. 206 §1-2, kuadro] Ripitishon ta yuda hende kòrda kos. Tambe e ta un manera efikas pa destaká ideanan prinsipal i yuda nos ouditorio komprondé nan mihó. Nos propósito ta pa duna informashon ku nos oyentenan por usa. Si nos oyentenan lubidá loke nos a bisa, nos palabranan lo no influensiá nan kreensianan ni nan manera di biba.
2. Den ki maneranan nos por enfatisá e tema di un diskurso? [be-PA pág. 210, kuadro Na promé lugá, skohe e puntonan prinsipal ku lo yuda nos desaroyá e tema. Despues, pensa kon i na unda nos lo enfatisá e tema, hasiendo sigur ku nos ta ripití e tema durante henter e diskurso. Durante e presentashon, ripití e palabra- òf ideanan klave konektá ku e tema.
3. Kua ta e puntonan prinsipal di un diskurso i kiko ta guia nos pa skohe nan? [be-PA pág. 212 §1-3] E puntonan prinsipal ta e ideanan importante ku ta krusial pa nos por logra e meta di e diskurso. Loke ta yuda nos skohe kua puntonan prinsipal pa usa, ta dependé di ken ta nos ouditorio i di e propósito di e diskurso. Tene bon kla na mente e meta ku nos ke logra ora nos ta papia ku un sierto ouditorio i skohe solamente informashon ku ta al kaso.
4. Dikon nos no mester usa demasiado punto prinsipal den un diskurso? [be-PA pág. 213 §3-5] Kualke tema ta konsistí di solamente un par di aspekto esensial. Si nos tin demasiado punto prinsipal, esei lo stroba nos di desaroyá nan tur bon. Ora nos kubri solamente un par di punto, esei lo duna e ouditorio tempu pa analisá kada punto ya asina nan por graba nan den nan mente.
5. Dikon ta importante pa nos introdukshon lanta interes i kon nos por logra esei? [be-PA pág. 215 §1; pág. 216 §1-3, kuadro] Ta dependé di nos introdukshon si hende lo skucha òf no, i kuantu atenshon nan lo duna nos. Pregunta ku ta pone hende pensa i ku ta laga nan sinti ku nan ta den un diálogo mental ku nos, ta lanta nan interes. Un eksperensia di bida real por kapta atenshon, pero tambe e mester prepará e tereno pa trata un aspekto importante di e kurpa di e diskurso. Un notisia resien òf un sita for di un fuente lokal por ta efikas, basta nan ta kuadra ku e tema.
PARTI NUM. 1
6. Kon Salmo 119:89 i 90 ta yuda nos komprondé ku nos por dependé riba Dios su palabra? [w05-PA 15/4 pág. 15 §3] Pa medio di Dios su palabra—“su ordenansanan di e shelunan”—solo, luna i strea ta move perfektamente den nan órbitanan i tera ta firmemente establesí pa semper. (Jòb 38:31-33; Sal. 104:5) Nos por dependé riba kada palabra ku ta sali for di boka di Yehova; loke e bisa ‘lo no keda sin alkansá’ e kumplimentu di su propósito. (Isa. 55:8-11)
7. Kiko e buki di Ezekiel ta enfatisá i ki resultado esei lo tin pa esnan ku ta santifiká Yehova den e manera ku nan ta hiba nan bida? [si-S pág. 137 §33] E profesia di Ezekiel ta duna di konosé ku e santifikashon di e nòmber di Yehova ta mas importante ku kualke otro kos. (Eze. 36:23) Yehova lo santifiká su nòmber dor di destruí tur esnan ku ta profaná su nòmber. E personanan ku awe ta santifiká Yehova den e manera ku nan ta hiba nan bida konforme ku su rekisitonan pa adorashon, lo haña kurashon i bida eterno mediante e riu ku ta kore for di e tèmpel di Yehova.
8. Kon ‘e palabra di Yehova’ por warda nos kurason? (Sal. 18:30) [w05-PA 1/9 pág. 30 §2] Ora Hesus a rechasá Satanas den desierto, Hesus no a pusta ku Diabel pa wak ken ta mas sabí. Dor di basa su defensa riba e Skritura, Hesus a papia di kurason i ta p’esei e strategia di Diabel ku a funshoná asina bon den Edén, a frakasá den kaso di Hesus. (Luk. 4:1-13) Satanas su trampanan lo frakasá serka nos tambe si nos yena nos kurason ku e palabranan di Yehova.
9. Kon e speransa di Reino ta destaká den henter e buki di Daniel? [si-S pág. 142 §23] Den un vishon Daniel a mira Yehova Dios komo e Soberano Supremo ku ta establesé un Reino ku nunka lo ser destruí. (Dan. 2:19-23, 44; 4:25) Yehova ta ser halsá i glorifiká komo e Ansiano di Dianan ku ta husga hende i nashonnan a base di e posishon ku nan a tuma pa ku su Reino. Yehova ta duna “unu manera un yu di hende . . . dominio, gloria i un reino” eterno. “E santunan di e Haltísimo” ta partisipá huntu ku Kristu Hesus “e Yu di hende” den e Reino. (Dan. 7:13, 14, 18, 22; Mat. 24:30; Rev. 14:14) E ta Miguel, e Gran Prens ku ta ehersé poder komo e Gobernante di e Reino pa garna i pone un fin na tur e reinonan di e mundu bieu aki. (Dan. 2:44; 12:1; Rev. 12:7-10)
10. Kon e buki di Oseas ta fortalesé nos fe den e profesianan inspirá di Yehova? [si-S pág. 145 §14] Tur loke Oseas a profetisá tokante Israel i Huda a kumpli. E nashonnan bisiña di Israel ku a praktiká idolatria i ku anteriormente a sosten’é, a bandon’é i el a sufri destrukshon total na man di Asiria na 740 promé ku nos era. (2 Rei. 15:20; 17:3-6, 18; Ose. 8:7-10) Yehova a mustra miserikòrdia na Huda i a salb’é, pero no pa medio di poder militar ma pa medio di su angel ku a mata 185.000 sòldá di Asiria. (2 Rei. 19:34,35; Ose. 1:7) Oseas su profesianan di restorashon a kumpli ora ku Yehova a rekohé Israel i Huda for di nan pais di eksilio na 537 promé ku nos era. (Esd. 2:1; 3:1-3; Ose. 1:10, 11; 2:14-23; 3:5; 11:8-11; 13:14; 14:1-9)
LESAMENTU SEMANAL DI BEIBEL
11. Kiko ta e nifikashon di e midimentu di e tèmpel den e vishon di Ezekiel, i ki garantia esei ta duna nos awe? (Eze. 40:2-5) [w99-PA 1/3 pág. 9 §6; pág. 14 §7] E vishon a sigurá e hudiunan den eksilio ku lo tin un restorashon kompletu di adorashon puru na Dios su tèmpel. E midimentu di e tèmpel a sirbi komo un garantia divino ku e vishon lo a kumpli ku tur siguridat. Awe nos por tin sigur ku nada—ni sikiera oposishon feros di parti di gobièrnunan poderoso—por stòp e restorashon di adorashon puru.
12. Ken ta e “prens” den e kumplimentu final di e vishon di Ezekiel? (Eze. 48:21) [w99-PA 1/3 pág. 16 §13-15; pág. 22-3 §19-20] E “prens” [òf, “kabesante,” NW] ta referí na un klase di hòmber ku tin un speransa terenal, kende lo sirbi den un kapasidat di supervishon den e mundu nobo. (Eze. 45:8, 9) Pa dékadanan kaba, e fiel ansianonan ungí ta entrenando e klase di kabesante, ku ta birando mas i mas grandi, pa e trabou di supervishon ei. Miéntras ku e 144.000 ta goberná ku Kristu den shelu, e klase di kabesante lo perkurá guia pa humanidat bou di e liderato di e Reino Mesiániko ei.
13. Kiko ta e nifikashon di Daniel 2:21? [w98-PA 15/9 pág. 12 §9] Esaki no ta nifiká ku Yehova ta direktamente responsabel pa kada konkista polítiko i kambio di gobernashon. Pero Yehova por intervení pa pone òf kita gobernantenan. E ta hasi esei na su tempu stipulá i na armonia ku su propósito.
14. Kiko a hasi Daniel “un hende masha stimá” den bista di Yehova? (Dan. 9:23) [dp-PA pág. 185 §12; w04-PA 1/8 pág. 12 §17] Daniel tabata determiná pa tene firme na adorashon puru, apesar di pruebanan ku a pone su bida na peliger. (Dan. 1:8; 2:12, 13; 6:8-11) El a hasi orashon regularmente na Yehova. El a studia i meditá riba Dios su Palabra i propósito. (Dan. 9:1, 2) El a resaltá Dios su hustisia i humildemente a rekonosé su propio faltanan. (Dan. 9:7, 14, 16, 20)
15. Den ki sentido no tabatin “konosementu di Dios den e tera” di Israel, i ki efekto e palabranan ei mester tin riba nos personalmente? (Ose. 4:1, 2, 6) [w05-PA 15/11 pág. 21 §21; jd-S pág. 58 §5; pág. 61-2 §10] Esaki no nesesariamente ta nifiká ku e israelitanan no tabata sa nada tokante e Palabra di Dios, pero “siendo satisfecho, nan kurason a bira orguyoso.” (Ose. 13:6) Nan tabata satisfecho ku nan poseshonnan material, p’esei nan no a aktua na armonia ku “konosementu di Dios.” (Ose. 4:1, 2) Nos awe tin ku tuma e palabranan ei komo un spièrtamentu personal pa nos no bira débil spiritualmente, lokual por pone nos bira infiel na Dios su normanan.