Un Karta di Kuerpo Gobernante
SIGUIENDO Hesus su ehèmpel, nos ta hasi orashon sinsero na Dios: “Bo nòmber sea santifiká.” Nos deseo profundo pa biba na armonia ku e orashon ei ta keda bisto den e manera ku nos ta hiba nos bida komo Testigu di Yehova. Klaru ku nos mester sa muchu mas ku djis e nòmber di Dios. Nos tin ku probechá di tur oportunidat pa glorifiká e nòmber ei. Definitivamente, e onor di mas grandi ku kualke un di nos por tin ta di ser yamá un Testigu di Yehova.—Mat. 6:9; Isa. 43:10.
Na armonia ku Salmo 110:3, e pueblo di Yehova ta dispuesto pa partisipá den e trabou ku Yehova a manda nan hasi. Dikon hende di tur edat i sirkunstansia di bida ta traha duru den e trabou di prediká? Na promé lugá, esei ta debí na nan amor pa Dios i nan dedikashon na dje. Deuteronomio 6:5 i 6 ta manda nos pa stima Yehova ku ‘henter nos kurason, henter nos alma i tur nos forsa.’ E amor sinsero aki ta motivá nos pa usa nos tempu, energia i rekursonan pa adelanto di interesnan di e Reino di Dios. I esaki ta inkluí partisipashon den e ministerio mas plenamente posibel, di akuerdo ku nos sirkunstansia.
Yehova su amor pa humanidat a motiv’é pa duna e mandato pa deklará e bon nobo di su Reino rònt mundu. E no ke pa niun hende wòrdu destruí sino pa tur arepentí di nan kaminda robes i akudí na nan Kreadó pa nan por haña bida. (2 Ped. 3:9) Yehova ta bisa: “Mi no tin plaser den e morto di e malbado, ma mas bien ku e malbado bira for di su kaminda i biba.” (Eze. 33:11) Ora nos ta partisipá den e ministerio, nos ta sirbi komo un evidensia visibel di Yehova su amor pa nos próhimo. Esaki sin duda ta kontribuí na e goso i satisfakshon ku nos ta haña ora nos ta partisipá den e trabou importante aki.
Nos amor profundo pa Yehova ta bisto tambe den nos punto di bista di su Palabra inspirá, e Santu Skritura. Sin Beibel, nos lo no por a siña konosé Yehova ni hala serka dje manera Santiago 4:8 ta invitá nos pa hasi. Nos lo no tabata sa tampoko dikon nos ta eksistí ni kiko tin den futuro. Nos lo no tabata sa ku ta e antepasado ku nos tur tin en komun, esta Adam, ta e fuente di nos problemanan. (Rom. 5:12) Nos lo no tabata sa tampoko di e gran amor ku Dios a manifestá ora el a manda su Yu unigénito komo un reskate pa nos. Ademas, tin hopi otro manera ku Yehova ta kompartí un grado di su konosementu, sabiduria i komprondementu ku nos. Nos ta balorá e regalo ku el a duna nos, su Palabra inspirá pa spiritu, masha hopi mes! Nos apresio pa e regalo maravioso aki ta motivá nos pa ‘hasi bon uso di nos tempu’ pa lesa, studia i meditá riba su dichonan. (Efe. 5:15, 16; Sal. 1:1-3) Nunka nos mester lamentá ku diariamente nos tin ku tuma tempu pa lesa e Palabra di Dios. Mas bien, nos amor pa Dios mester atraé nos na su Palabra ku ta yuda nos oumentá nos komprondementu di dje i tambe profundisá nos amor p’e.
For di Beibel nos a siña ku ora Adam a peka kontra Yehova, el a hinka tur su futuro desendientenan, inkluso kada un di nos, den un situashon deplorabel i sin speransa. Sin embargo, Dios tabata por i el a perkurá un eskape pa humanidat. El a tuma medida pa hasi sigur ku su propósito pa e tera aki lo ser realisá.—Gén. 3:15.
Sin duda, nos kada un tin e deseo fuerte pa santifiká e nòmber maravioso di nos Dios. Segun ku nos ta oumentá den konosementu i ta mira ki un Dios maravioso Yehova ta, nos ta sinti nos motivá pa koperá kuné i ku su organisashon pa hasi su gran nòmber i propósito konosí. Nos ta haña mas i mas konfiansa ku nos tin su aprobashon i bendishon awor i un futuro eterno den e mundu nobo.
Komo miembronan di e Kuerpo Gobernante, nos ke konfirmá nos amor pa boso, nos rumannan stimá. Nos ke ekspresá tambe nos apresio profundo pa boso esfuersonan diligente pa usa e tempu ku a resta promé ku e “gran tribulashon” pa alkansá mas tantu hende posibel ku e bon nobo. (Rev. 7:14) Ora boso ta hasi esei, boso ta duna nan e mesun oportunidat ku boso a risibí, esta, di gana e konosementu di Dios i di Kristu ku ta hiba na bida eterno.—Juan 17:3.
Boso rumannan,
Kuerpo Gobernante di Testigunan di Yehova