Kaha di Pregunta

◼ Ta apropiá pa organisá porch sale òf otro aktividatnan pa rekoudá fondo pa yuda e kongregashon?

Ta normal pa organisashonnan religioso organisá aktividatnan pa rekoudá fondo manera sena, marshe di pruga òf fiesta. Ounke algun hende por pensa ku esakinan ta pa un bon kousa, en realidat e aktividatnan aki ta maneranan pa pidi plaka. Testigunan di Yehova no ta yega na nan fondonan di e manera ei.

E di dos edishon di E Toren di Vigilansia na ingles di ougùstùs 1879 a duna e siguiente motibu pakiko nos ta nenga di imitá e iglesianan i pidi fondo: “Nos ta kere ku ta YEHOVA ta esun ku ta sostené ‘Zion’s Watch Tower,’ i miéntras ku esei ta e kaso, nunka nos lo no roga ni pidi hende sosten. Ora Esun ku ta bisa: ‘Tur oro i plata di e serunan ta di mi’ stòp di perkurá e fondonan nesesario, nos lo komprondé ku ta tempu pa stòp ku e publikashon.”

Ainda nos ta sigui e prinsipio bíbliko: “Laga kada un hasi manera el a proponé den su kurason; no kontra su gustu òf obligá; pasobra Dios ta stima esun ku ta duna ku alegria.” (2 Kor. 9:7) Den Salòn di Reino tin kahanan di kontribushon pa e personanan ku ta deseá di hasi donashonnan boluntario. (2 Rei. 12:9) Nos no ta pidi kontribushon; e persona ku duna tampoko no ta spera di haña algu a kambio di loke el a duna.