No Pèrdè Bo Promé Amor
1 Hesus glorifiká a bisa e kongregashon di promé siglo na Efeso: “Mi tin esaki kontra bo, ku bo a bandoná bo promé amor.” (Rev. 2:4) Aparentemente, hopi di su miembronan a pèrdè e amor ku nan tabatin na prinsipio pa Yehova. Segun ku nos a siña e bèrdat, nos a desaroyá un amor fuerte pa Yehova i pa nos próhimo, i esaki a motivá nos pa proklamá nos speransa nobo ku entusiasmo. Kiko por yuda nos pa nos no pèrdè e amor ku nos tabatin na prinsipio i tambe nos smak den e ministerio?
2 Estudio Personal i Asistensia na Reunion: Kiko a yuda nos kultivá amor pa Dios i pa nos próhimo ora nos a siña e bèrdat na prinsipio? Esei no ta tur loke nos a siña tokante Yehova durante nos estudio di e Skritura? (1 Juan 4:16, 19) P’esei anto, pa nos amor “abundá mas i mas ainda,” nos tin ku sigui gana konosementu eksakto, kobando den ‘e kosnan profundo di Dios.’—Fil. 1:9-11; 1 Kor. 2:10.
3 Durante e último dianan aki yen di ansiedat i distraishon, por ta un berdadero reto pa mantené un bon rutina di estudio personal. (2 Tim. 3:1) Nos tin ku apartá tempu pa nos alimentá nos mes ku kuminda spiritual. Asistensia regular na reunionnan di kongregashon tambe ta masha importante, spesialmente segun ku nos “ta mira ku e dia ta yegando serka.”—Heb. 10:24, 25.
4 E Ministerio: Partisipashon ku entusiasmo den e ministerio ta yuda nos mantené nos promé amor pa Dios. Segun ku nos ta prediká e bon nobo, nos ta graba e promesanan amoroso di Yehova den nos mente i esaki ta yuda nos mantené nos speransa i amor bibu. Pa nos siña otro hende e bèrdatnan di Beibel, nos mes tin ku hasi investigashon pa komprondé nan bon kla, i esaki na su turno ta fortalesé nos fe.—1 Tim. 4:15, 16.
5 Yehova meresé tur kos, inkluso nos amor. (Rev. 4:11) No laga esun di bo mengua. Perkurá pa bo promé amor keda fuerte mediante estudio personal diligente di Beibel, asistensia regular na reunion i partisipashon ku entusiasmo den e trabou di deklará na otronan loke mas bo ta stima.—Rom. 10:10.