Repaso di Skol di Ministerio Teokrátiko
Lo konsiderá e siguiente preguntanan oralmente na e Skol di Ministerio Teokrátiko durante e siman ku ta kuminsá dia 28 di ougùstùs 2006. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 3 di yüli te ku 28 di ougùstùs 2006. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Di ki manera kontakto visual ta yuda nos bira mihó maestro? (Mat. 19:25, 26; Echo. 14:9, 10) [3 di yüli, be-PA pág. 124 §3–pág. 125 §3] Kontakto visual apropiá ta duna evidensia ku nos tin interes personal den otro hende i ku nos tin algu importante pa bisa. Nos smail kariñoso i manera amigabel lo por yuda esnan ku ta skucha nos sinti nan trankil. Dor di opservá e ekspreshon di nan wowo nos lo por haña un idea kon pa trata ku e situashon.
2. Dikon ta importante pa papia di un manera natural, i kiko por yuda nos hasi esei ora nos ta partisipá den sirbishi di vèlt? [17 di yüli, be-PA pág. 128 §1-5, kuadro] Ora nos ta ekspresá nos mes di un manera ku ta reflehá dignidat i ku ta a la bes natural nos ta gana konfiansa di otro hende. Si nos ta steif òf innatural den nos manera di papia, esei por kita hende su atenshon for di loke nos ta bisa. Algun sugerensianan ku lo por yuda nos vense nèrvio i ekspresá nos mes na un manera mas natural den sirbishi di vèlt ta (1) prepará kuidadosamente, (2) hasi orashon ferviente, (3) pensa riba e miserikòrdia ku Yehova ta mustra na tur hende dor di duna nan e oportunidat di biba pa semper, (4) kòrda ku hende ta liber pa skohe, pues nan por sea aseptá òf rechasá e mensahe i (5) kòrda ku nos tarea ta simplemente pa prediká.
3. Dikon nos mester ta limpi i na òrdu? [7 di oug., be-PA pág. 131 §1-3] Ora nos ta limpi i na òrdu, esei ta trese gloria na Dios i ta duna un bon impreshon di su organisashon. (1 Kor. 10:31) Si nos kurpa i paña ta limpi, hende probablemente lo konkluí ku nos ta respetá nos mes i nan lo ta mas dispuesto na skucha nos.
4. Kon ser “desente i moderá” lo mester influensiá nos manera di bisti i peña? (1 Tim. 2:9) [14 di oug., be-PA pág. 131 §4–pág. 132 §1] Un persona desente no kier ofendé otro hende innesesariamente. Sano huisio òf moderashon ta yuda nos skohe nos pañanan ku prudensia i evitá modanan di bisti i estilo di kabei ekstrabagante. Sea nos ta na skol, na trabou òf den sirbishi di vèlt nos manera di bisti apropiá semper mester indiká ku nos ta respetá e normanan di Dios.
5. Kua prinsipionan bíbliko nos mester apliká pa hasi sigur ku nos aparensia personal no ta reflehá amor pa mundu? [28 di oug., be-PA pág. 133 §2-3] Promé Juan 2:15-17 ta spièrta nos pa no stima mundu, ni e kosnan ku tin den mundu. Komo sirbidó di Yehova, nos ta rechasá modanan di Satanas su sistema ku no ta reflehá e personalidat kristian. Efesionan 2:2 ta hala atenshon na e spiritu di rebeldia ku tin den e sistema malbado aki. Desobedensia na outoridat hopi bes ta ser reflehá den e aparensia sèksi, deskuidá i slòns di hende djawendia. En bes di imitá mundu, nos ta laga e ehèmpel di kristiannan madurá influensiá nos manera di bisti i peña. (1 Tim. 4:12; 1 Ped. 5:2, 3)
PARTI NUM. 1
6. Kiko ta e benefisio di mas grandi ku ta bini di lesamentu? [10 di yüli, be-PA pág. 21 §3] Lesamentu por yuda bo “deskubrí e konosementu di Dios.” (Pro. 2:5) E abilidat di lesa ta hunga un ròl den hopi faseta di nos sirbishi na Dios. Ta prinsipalmente nos manera di lesa ta determiná kon efikas nos lo ta den sirbishi di vèlt. Pa prepará pa aktividatnan spiritual nos mester lesa.
7. Kiko ta determiná si un persona ta sabí òf bobo? (Pro. 14:2) [24 di yüli, w04-PA 15/11 pág. 26 §5] E persona rekto ta teme e Dios berdadero, i “e temor di SEÑOR ta e prinsipio di sabiduria.” (Sal. 111:10) Un persona berdaderamente sabí sa ku su obligashon ta pa “teme Dios i warda su mandamentunan.” (Ekl. 12:13) E persona bobo ta hiba un bida ku no ta na armonia ku e normanan rekto di Dios. Su kamindanan ta pèrvèrso i trosí.
8. Dikon “konosementu ta [algu] fásil pa esun ku tin komprondementu”? (Pro. 14:6) [31 di yüli, w04-PA 15/11 pág. 28 §4-5] Komprondementu ta e abilidat pa konektá vários aspekto di un tópiko i mira e totalidat, no djis e partinan isolá. Ta mas fásil pa un hende ku tin komprondementu siña i kòrda detayenan nobo pasobra e por mira kiko nan tin di haber ku Yehova su propósito general pa humanidat i pa tera.
9. Kiko kier men studia? [7 di oug., be-PA pág. 27 §3] E ta mas ku lesa aribariba. E ta enserá usa bo kapasidat mental pa eksaminá un tema kuidadosamente òf pa basta ratu. E ta inkluí analisá loke bo ta lesa, kompar’é ku loke bo sa kaba i wak ta kiko ta e motibunan tras di sierto deklarashon.
10. Ora nos meditá riba Yehova su obranan di kreashon, kon esei mester influensiá nos? [14 di oug., w04-PA 15/11 pág. 8 §4] Meditashon mester influensiá nos den por lo ménos tres manera. E por (1) rekordá nos pa apresiá nos bida, (2) motivá nos pa yuda otro hende siña for di kreashon i (3) stimulá nos pa siña konosé nos Kreadó mas mihó i apresi’é mas tantu.
LESAMENTU SEMANAL DI BEIBEL
11. Den e idioma original Salmo 68:11 ta papia di un ehérsito grandi di “hende muhé ku ta anunsiá e bon nobo.” Den antigwedat, kon Yehova a “duna e palabra” pa nan hasi esei, i kon esei ta apliká awe? Yehova a bisa òf manda, e hende hòmbernan di Israel pa bringa kontra e nashonnan enemigu di e Tera Primintí i derotá nan. Segun ku e israelitanan tabata derotá nan enemigunan, e hende muhénan israelita tabata anunsiá e bon notisia aki mediante selebrashonnan di viktoria. Awendia, ministernan femenino ta anunsiá e bon notisia di viktorianan teokrátiko, manera entre otro ku Satanas a wòrdu tira abou na tera, den kumplimentu di e Palabra di Yehova. Na armonia ku e Palabra di Dios, hende muhé kristian tambe ta proklamá na e nashonnan ku pronto e Rei Mesiániko, Hesukristu, lo vense nan. [3 di yüli, w86-S 15/10 pág. 30]
12. Kiko a hera pone Asaf stòp di hasi loke ta bon, i kon su pensamentu a wòrdu reahustá? (Sal. 73:2, 3, 17) Ounke Asaf a rekonosé Yehova su bondat, envidia kontra e prosperidat material di bromadónan inhustu a pon’é puntra su mes si ta bale la pena pa hiba un bida rekto. (Sal. 73: 1, 13) Su pensamentu a wòrdu reahustá ora el a bai “den e santuario di Dios” i a meditá entre kompañeronan di fe. Si awendia e aparente prosperidat di hende malbado ta molestiá nos, nos por buska kontesta pa nos preguntanan dor di asosiá ku e pueblo di Dios den adorashon. [10 di yüli, w93-PA 15/7 pág. 28 §3, 5; pág. 30 §1]
13. Dikon e mana proveé pa e israelitanan a ser yamá “kuminda for di shelu” i “pan di angel”? (Sal. 78:24, 25) E fuente di e mana tabata selestial, ya ku ta riba Yehova su mandato e tabata ser proveé. (Sal. 105:40) “Pan di angel” por ta referí na angelnan ku Yehova kisas a usa pa perkurá e mana den un manera sobrenatural. (Sal. 103:20) [17 di yüli, w06-PA 15/7 “E Palabra di Yehova Ta Bibu—Puntonan Sobresaliente di Buki Tres i Kuater di Salmonan”]
14. Kon nos por “biba” bou di e protekshon di e Haltísimo? (Sal. 91:1, 2) Esaki ta un estado den kua nos ta ser protehá kontra daño spiritual, un paradeis spiritual. Hende ku no ta konfia den Dios no ta haña e protekshon ei. Nos ta “biba” serka Yehova dor di akudí na dje komo nos refugio i fòrti, dor di alab’é komo e Gobernante Soberano di universo, i dor di prediká e bon notisia di e Reino. [31 di yüli, w06-PA 15/7 “E Palabra di Yehova Ta Bibu—Puntonan Sobresaliente di Buki Tres i Kuater di Salmonan”]
15. Den ki sentido morto di Yehova su sirbidónan leal ta presioso den su bista? (Sal. 116:15, NW) Morto di henter e grupo di adoradó leal di Yehova ta algu asina presioso, un preis asina haltu pa paga, ku Yehova lo no permití esei sosodé. (Sal. 116:8) Si e laga esei sosodé, lo e pèrdè su reputashon di ta todopoderoso i kapas pa salba su sirbidónan leal. Ademas, si esei sosodé lo no resta ningun hende riba tera pa forma e fundeshi di e mundu nobo. [28 di oug., w06-PA 1/9 “E Palabra di Yehova Ta Bibu—Puntonan Sobresaliente di Buki Sinku di Salmonan”]