Nos Ministerio—Un Obra di Kompashon
1 Hesus a bisa ku e multitutnan ku a skucha su mensahe tabata “kansá i plamá, manera karné sin wardadó.” (Mat. 9:36) Ku ternura i amor el a siña nan e normanan di Yehova, konsolá nan, i ku kompashon el a satisfasé nan nesesidatnan spiritual. Segun ku nos ta meditá riba Hesus su manera di trata ku hende, nos ta siña pensa i sinti meskos kuné, i e kualidat aki di kompashon ta bira bisto den nos ministerio.
2 Djis pensa un ratu riba e manera ku Hesus a reakshoná ora hende ku tabata desesperá pa yudansa a aserk’é. (Luk. 5:12, 13; 8:43-48) El a mustra konsiderashon na e personanan aki ku tabatin nesesidatnan spesial. (Mar. 7:31-35) E tabata tene kuenta ku sintimentu di otro hende i a mustra interes den nan. E tabata wak mas aleu ku aparensia. (Luk. 7:36-40) Sí, di un manera perfekto Hesus a reflehá e tierno kompashon di nos Dios.
3 “El A Sinti Kompashon”: Hesus no a kumpli ku su ministerio djis pasobra tabata un obligashon. Mas bien, el “a sinti kompashon” pa hende. (Mar. 6:34) Di mes manera awe nos no ta djis hiba un mensahe, sino ta purba salba bida presioso. Purba komprondé dikon hende ta reakshoná na un sierto manera. Dikon nan ta preokupá? Wardadónan di religion falsu a neglishá i siega nan? Nos interes sinsero den otro hende lo por motivá nan pa skucha e bon nobo.—2 Kor. 6:4, 6.
4 Kompashon ta konmové kurason. Por ehèmpel, un señora tabata tristu pa motibu di e morto trágiko di su yu muhé di tres luna. Ora dos Testigu a yama na su porta, el a invitá nan pa drenta ku e intenshon di refutá nan argumentonan tokante e motibu pakiko Dios ta permití sufrimentu. Sin embargo, despues e señora a bisa: “Nan a skucha mi ku masha kompashon, i ora nan tabata bai mi a sinti mi asina bon ku mi a aseptá pa nan bolbe bishitá mi.” Abo ta hasi esfuerso pa mustra kompashon na tur hende ku bo topa den sirbishi?
5 Ora nos ta kultivá e kualidat di kompashon, esaki por yuda nos duna berdadero konsuelo na otro hende. Hasiendo asina, nos ta glorifiká Yehova, “e Tata di miserikòrdianan.”—2 Kor. 1:3.