Repaso di Skol di Ministerio Teokrátiko
Lo konsiderá e siguiente preguntanan oralmente na e Skol di Ministerio Teokrátiko durante e siman ku ta kuminsá dia 26 di yüni 2006. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 1 di mei te ku 26 di yüni 2006. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Kiko ta modulashon i dikon e ta importante? [be-PA pág. 111, kuadronan] Modulashon ta e variedat den volúmen, ritmo i tono di papia. E ta un kualidat di papia masha importante pasobra e ta lanta sintimentu di nos oyentenan i ta motivá nan pa aktua. Bon uso di modulashon lo yuda nos oyentenan kapta e nifikashon di loke ta ser tratá.
2. Kon nos por varia nos ritmo ora nos ta duna un diskurso? [be-PA pág. 112 §3-6, kuadro] Nos ritmo mester kuadra ku loke nos ta bisando. P’esei, nos no ta logra un ritmo apropiá dor di djis kuminsá papia lihé òf bai mas sosegá kada tantu ratu. Por ehèmpel, hopi bes ta mihó pa papia mas lihé ora nos ta trata puntonan ménos importante òf ora nos kier transmití entusiasmo. Di otro banda, ora nos ta ekspresá argumentonan di mas peso, ideanan prinsipal i puntonan kulminante di e presentashon, nos mester papia mas slow.
3. Kon nos por kultivá entusiasmo pa e tema di nos presentashon, i dikon esaki ta importante? [be-PA pág. 115 §1–pág. 116 §2, kuadronan] Pa nos por kultivá entusiasmo, nos tin ku prepará no solamente e informashon, sino tambe nos kurason; esei ta nifiká ku nos mester enbolbé nos sintimentunan. (Esd. 7:10, NW) Ora nos ta konvensí ku nos informashon ta balioso i ku nos oyentenan lo benefisiá for di dje, nos lo sinti nos entusiasmá tokante loke nos ta bai bisa. Esaki ta importante pasobra entusiasmo lo yuda nos mantené e interes di nos oyentenan; tambe e por motivá nan pa aktua.
4. Dikon ta importante pa nos papia ku sintimentu tierno ora nos ta siña otro hende, i kiko por yuda nos hasi esaki? [be-PA pág. 118 §2–pág. 119 §4] Ora nos ta papia ku sintimentu, nos palabranan ta haña un beyesa i profundidat, i esei ta esensial si nos ke influensiá bida di nos oyentenan i alkansá nan kurason. Ora nos, meskos ku Hesus, ta sinti kompashon pa hende i di bèrdat ke yuda nan, esaki lo yuda nos ekspresá e kualidat importante aki. (Mar. 1:40, 41; Luk. 8:48)
5. Splika dikon gesto i ekspreshon di kara ta importante ora hende ta komuniká ku otro. (Mat. 12:48, 49) [be-PA pág. 121, kuadronan] Ta importante pa nos komprondé ku no ta ku stèm so hende ta komuniká idea, sintimentu i aktitut, sino tambe mediante gesto i ekspreshon di kara. Hopi bes nos ta usa nos wowo i nos boka i e posishon di nos kabes pa enfatisá loke nos ta bisa i pa transmití sintimentu. Si un oradó no ta hasi gesto ni ekspresá nada ku su kara, esaki por duna e impreshon ku e ta indiferente.
PARTI NUM. 1
6. Kon e buki di Jòb ta alabá Yehova i enfatisá su normanan hustu di bida? [si-S pág. 100 §39, 41] E buki di Jòb ta referí na Yehova 31 bes komo e Todopoderoso; esaki ta hopi mas tantu ku tur e otro bukinan di e Skritura. Bes tras bes Yehova ta ser alabá pa su posishon halsá, eternidat, sabiduria, poder, hustisia, bondat amoroso i miserikòrdia. (Jòb 10:12; 36:26; 37:23) E buki ta mustra ku vindikashon di Yehova ta mas importante ku salbashon di humanidat. (Jòb 33:12) Tambe e buki ta kondená materialismo, idolatria, adulterio, orguyo, inhustisia, faboritismo, falta di onrades i mentira ya ku tur e kosnan aki ta hiba na desaprobashon di Dios. (Jòb 31:5, 9, 13, 17, 24-28)
7. Kiko ta mustra ku e buki di Salmonan ta outéntiko? [si-S pág. 102 §10-11] Despues di su resurekshon, Hesus a bisa su disipelnan ku tur e kosnan skirbí tokante dje den e Salmonan mester a kumpli. (Luk. 24:44) Asina el a indiká ku e Salmonan ta kontené hopi profesia. Ademas, nan ta kompletamente na armonia ku e restu di e Skritura i hopi bes eskritornan di e Skritura Griego Kristian a sita for di nan. (Echo. 13:33; Rom. 3:13)
8. Kiko e palabra “prudente” na Proverbionan 13:16 ta nifiká? [w04-PA 15/7 pág. 28 §3-4] Aki ‘prudensia’ tin di haber ku konosementu optené dor di analisá e echonan i e Skritura, i no dor di spekulashon òf dor di djis sigui e mayoria. Na kontraste ku un hende bobo ku ta usa su boka pa plama bobedat, e persona prudente ta papia i aktua sabiamente. Pues, e persona prudente ta frena su lepnan i ta evitá problemanan ku ta bini dor di papiamentu ku malisia òf sin pensa.
9. Kon spiritu santu ta funshoná komo un ayudante, i e echo ku nos sa esaki mester animá nos pa hasi kiko? (Juan 14:25, 26, BPK) [be-PA pág. 19 §2-3] Spiritu santu por yuda nos kòrda kosnan importante ku nos a yega di studia. E no ta pone den nos mente kos ku nunka nos no a siña. Den algun kaso asta dékadanan despues, el a yuda eskritornan di e Evangelio kòrda detayenan di loke Hesus a bisa i hasi ora e tabata huntu ku nan. Esaki mester animá nos pa siña mas tantu posibel di Yehova i su propósito i yuda otro hende hasi meskos.
10. Den ki sentido general Hesus ta bin i na kua ‘binida’ el a referí ora el a bisa e palabranan registrá na Mateo 16:28? [w04-PA 1/3 kuadro pág. 16] Hesus ta bin òf yega den e sentido ku e ta dirigí su atenshon na humanidat òf na su siguidónan, hopi bes pa huisio. (Mat. 24:46, 50; 25:19, 31) Na Mateo 16:28, Hesus ta referí na komienso di su presensia real komo e Rei Mesiániko entronisá na 1914.
LESAMENTU SEMANAL DI BEIBEL
11. Kiko nos por siña for di Jòb su kontesta na Yehova, registrá na Jòb 42:1-6? Ora Jòb a tende e palabra di Yehova i a ser rekordá di e manifestashonnan di su poder, esei a yud’é “mira Dios,” es desir, mira e bèrdat tokante Dios. (Jòb 19:26) Esaki a ahustá su manera di pensa. Ora nos ser korigí for di Beibel, nos mester ta kla pa rekonosé nos eror i hasi ahuste. [1 di mei, w06-PA 15/3 “E Palabra di Yehova Ta Bibu—Puntonan Sobresaliente di e Buki di Jòb”]
12. Kiko ta e “kos bano” ku e nashonnan ta plania? (Sal. 2:1, 2) E “kos bano” ta e gobièrnunan humano su preokupashon konstante pa sigui konserbá nan propio outoridat. Esaki ta bano pasobra nan propósito lo frakasá sigur. Akaso e pueblonan di e nashonnan realmente por ferwagt ku nan lo tin éksito ora ku nan tuma nan posishon ‘kontra Yehova i kontra su [rei] ungí ‘? [8 di mei, w06-PA 15/5 “E Palabra di Yehova Ta Bibu—Puntonan Sobresaliente di Buki Ún di Salmonan”]
13. Ta kua fundeshinan ta ser destruí? (Sal. 11:3) Esakinan ta e fundeshinan riba kua sosiedat humano ta basá: lei, órden i hustisia. Ora esakinan ta desorganisá i konfuso, ta reina desórden sosial i no tin hustisia. Den sirkunstansianan asina, “e hustu” tin ku pone su pleno konfiansa den Dios. (Sal. 11:4-7) [15 di mei, w06-PA 15/5 “E Palabra di Yehova Ta Bibu—Puntonan Sobresaliente di Buki Ún di Salmonan”]
14. Kon Yehova ta “paga abundantemente” un persona ku ta aktua ku orguyo? (Sal. 31:23) E pago ku e salmo aki ta menshoná ta kastigu. Un persona hustu ta haña disiplina for di Yehova komo e rekompensa òf pago pa su erornan ku no ta intenshonal. Komo ku un persona orguyoso no ta bira bèk for di su mal kaminda, su pago ku e ta haña ta kastigu severo. (Pro. 11:31; 1 Ped. 4:18) [29 di mei, w06-PA 15/5 “E Palabra di Yehova Ta Bibu—Puntonan Sobresaliente di Buki Ún di Salmonan”]
15. Ki konsuelo nos por optené for di Salmo 40 ku por yuda nos trata ku e imperfekshon di nos karni pekaminoso i e vários kalamidatnan di e sistema di kosnan aki? (Sal. 40:1, 2, 5, 12) Spera riba Yehova por yuda nos trata ku depreshon i asina sali “for di e pos di destrukshon, for di e lodo di klei.” Si nos no pèrdè for di bista e echo ku nos bendishonnan ta “muchu hopi pa konta,” kalamidatnan i faltanan personal, pa kuantu ku nan por ta, lo no aplastá nos. [12 di yüni, w06-PA 15/5 “E Palabra di Yehova Ta Bibu—Puntonan Sobresaliente di Buki Ún di Salmonan”]