Kon pa Mantené Bo Selo
1 E selo ku Apolos a desplegá den su ministerio por pone nos kòrda riba nos rumannan kristian djawe ku ta masha seloso den e trabou di prediká. (Echo. 18:24-28) Sin embargo, e spièrtamentu pa “no flakia den diligensia, ma [pa ta] ferviente den spiritu,” ta konta pa nos tur. (Rom. 12:11) Kiko por yuda nos kultivá i mantené selo pa e ministerio kristian?
2 Stimulá dor di Konosementu: Despues ku Hesus a aparesé na dos di su disipelnan i “a splika nan e kosnan tokante di su mes den tur e Skrituranan,” nan a remarká: “Nos kurason no tabata kima den nos miéntras ku e tabata papia ku nos na kaminda?” (Luk. 24:27, 32) I kiko di nos awe? Nos tambe no ta yena ku entusiasmo segun ku nos ta haña mas komprondementu di e Palabra di Dios? Sí, konosementu ta stimulá fe. Romanonan 10:17 ta splika: “Fe ta bin for di tendementu.” Ora nos kurason ta yen di konfiansa den e promesanan di Yehova, nos no por stòp di papia di e kosnan ku nos a siña!—Sal. 145:7; Echo. 4:20.
3 Pa nos amor pa Dios keda fuerte i nos selo pa su sirbishi keda ferviente nos no por dependé solamente riba e konosementu ku nos a haña for di estudionan di pasado. Nos tin ku sigui amplia nos komprondementu di e bèrdat i profundisá nos amor pa Yehova. Si nos no hasi esei, gradualmente nos sirbishi na dje lo bira algu rutinario. (Rev. 2:4) E Palabra di Dios ta urgi nos pa ‘sigui . . . oumentá nos konosementu eksakto di Dios.’—Kol. 1:9, 10, NW.
4 Nos Kustumbernan di Estudio: P’esei, ta bon pa nos analisá nos kustumbernan di estudio. Por ehèmpel, kisas nos por marka e kontestanan den nos artíkulo di estudio di Toren di Vigilansia i duna bon komentario. Pero nos ta buska e tekstonan menshoná i meditá riba kon nos por apliká e informashon den nos bida? Pa loke ta e lesamentu semanal di Beibel, nos ta hasi esfuerso pa hasi investigashon adishonal te asina leu ku nos sirkunstansianan ta permití, i meditá riba e lèsnan ku nos ta saka? (Sal. 77:11, 12; Pro. 2:1-5) Ta masha benefisioso pa nos dediká tempu na e Palabra di Dios i meditá riba dje! (1 Tim. 4:15, 16) Un estudio serio asina ta sostené nos i duna nos e ánimo pa nos sigui “ku selo den hasimentu di bon obra.”—Tito 2:14.