Bo Yu Lo Por Tuma un Desishon Maduro?
1 Un desishon maduro tokante kiko? Transfushon di sanger. E artíkulo ku a sali den E Toren di Vigilansia na spañó di 15 di yüni 1991 titulá “Kana Manera Yehova Ta Instruí Nos,” ta mustra ku yunan di Testigunan di Yehova a yega di haña nan ta tuma un posishon kla i firme pa duna prueba ku nan deseo di obedesé Dios su lei tokante sanger ta mesun importante pa nan ku e ta pa nan mayornan. Bo yu menor di edat tambe lo por hañ’é den un situashon ku e tin ku hasi esei?
2 Kiko Lei Ta Bisa? Na Merka, e korte di mas haltu ku a disidí riba e asuntu di un menor di edat maduro su derecho di nenga transfushon di sanger ta e Korte Supremo di Illinois. Despues di a repasá e kaso di un ruman muhé di 17 aña, e korte a dekretá: “Si tin pruebanan kla i konvinsente ku e menor ta sufisiente maduro pa komprondé e konsekuensianan di su aktonan i pa tin e disernimentu di un persona adulto, e ora ei e prinsipio di menor maduro ta dun’é e derecho a base di lei di hurisprudensia [anglo-merikano] pa konsentí òf rechasá sierto tratamentunan médiko.” Pues, ora di determiná si un mucha ta sufisiente maduro pa tuma su propio desishon, dòkternan òf outoridatnan lo por entrevistá e pashènt pa tende for di dje mes dikon e no ke tuma sanger. E hóben lo mester ta komprondé na un grado rasonabel e gravedat di su kondishon médiko i e konsekuensianan di e opshonnan pa tratamentu ku e tin. Anto lo e mester ekspresá na un manera kla i firme loke ta su kreensia religioso relashoná ku Dios su lei tokante sanger.
3 Kiko Bo Yu Lo Bisa? Bo yunan ta bon prepará pa ekspresá nan mes riba e kuestion aki? Nan ta kere di henter nan kurason ku ta un mandamentu di Dios pa ‘apstené di sanger’? (Echo. 15:29; 21:25) Nan por splika nan kreensia for di e Skritura? Nan lo defendé ku kurashi nan desishon firme tokante sanger si dòkternan ta kere ku nan bida ta na peliger, asta si nan mayornan no ta presente? Siendo ku “tempu i suseso imprevisto ta kai riba [nos] tur,” kon bo por prepará bo yunan pa kualke tèst inesperá di nan integridat?—Ekl. 9:11, NW; Efe. 6:4.
4 Mayornan, Kiko Boso Por Hasi? Boso tin e responsabilidat di siña boso yunan Dios su punto di bista di sanger. (2 Tim. 3:14, 15) Tin un splikashon bon kla den e buki Rasonamentu, na spañó, página 345-8. Studi’é kuidadosamente ku boso famia. Usando e sekshon “Si un persona bisa ...” na página 348-50, tene seshonnan di práktika ku boso yunan pa yuda nan haña eksperensia den splika kiko nan ta kere i dikon nan ta kere esei. (1 Ped. 3:15) Otro provishonnan ku tin pa eduká nos tokante e kuestion di sanger ta, entre otro, e foyeto Con sanger por salba bo bida? i E Toren di Vigilansia di 15 di yüni 2004, página 14-24. Ademas, e programanan di vidio Asistensia Médiko sin Transfushon: Kumpliendo ku Nesesidat i Derecho di Pashènt i Sin Sanger—Medisina Ta Aseptá e Reto, ku aktualmente ta disponibel riba e DVD titulá Seri di Dokumentario—Alternativanan pa Transfushon, ta duna informashon konvinsente pa mustra kon rasonabel i efektivo medisina i sirugia sin sanger ta. Boso famia a wak e presentashonnan aki resientemente i a kòmbersá over di nan?
5 Yuda boso yunan ‘komprobá pa nan mes kiko e bon, agradabel i perfekto boluntat di Dios’ ta relashoná ku sanger. E ora ei nan por tuma un desishon maduro ku tin Yehova su bendishon.—Rom. 12:2.
[Study Questions]
1. Ki posishon hóbennan Testigu a tuma relashoná ku uso di sanger? Duna un ehèmpel.
2. Ki norma hurídiko un korte a apliká na un menor ku a nenga transfushon di sanger, i kiko mayornan kristian i nan yunan menor di edat ta siña for di esaki?
3. Ki preguntanan mayornan lo mester konsiderá seriamente, i dikon?
4, 5. (a) Ki responsabilidat mayornan tin, i kon nan por kumpli kuné? (b) Ki provishonnan tin disponibel pa yuda mayornan?