Repaso di Skol di Ministerio Teokrátiko
Lo konsiderá e siguiente preguntanan oralmente na e Skol di Ministerio Teokrátiko durante e siman ku ta kuminsá dia 27 di yüni 2005. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 2 di mei te ku 27 di yüni 2005. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Dikon komparashon i metáfora ta medionan poderoso pa siña otro hende? (Gén. 22:17; Sal. 1:3; Sant. 3:6) [1, be-PA pág. 240 §2–pág. 241 §1, kuadro na pág. 240] Komparashon i metáfora ta krea imágennan mental bibu usando djis un par di palabra. Si nos hasi bon uso di nan, esaki por touch kurason di nos oyentenan i yuda nan kòrda loke nos a bisa nan mihó ku ora nos djis menshoná sierto echo.
2. Unda nos por haña ehèmpelnan ku ta siña nos lèsnan balioso, pero kiko nos mester tene kuenta kuné? [3, be-PA pág. 242 §2-3] Dios su Palabra inspirá ta yen di ehèmpelnan di bida real. Hesus a referí na “Lòt su esposa” i na “e dianan di Noe.” (Luk. 17:32; Mat. 24:37-39) Segun ku nos ta siña konosé Beibel mihó, nos por usa e ehèmpelnan aki. Si nos usa un eksperensia real di nos tempu, nos mester sòru p’e ta konfirmá, hasi sigur ku e tin un bon propósito i no lag’é kita atenshon for di e meta di nos presentashon.
3. Ora di skohe ilustrashon, kiko nos mester tene na mente pa nan ta mas efikas? [5, be-PA pág. 244 §1-2] Nos ilustrashonnan mester ta adekuá pa nos ouditorio. Esaki ta rekerí pa nos opservá bida rònt di nos i pensa kuidadosamente riba e aktividatnan i kultura di nos oyentenan. (Mar. 2:22; 4:2-9; Juan 10:1-5)
4. Dikon nos mester usa medionan visual pa siña hende i kon Yehova a hasi esaki? [7, be-PA pág. 247 §1-2, kuadro] Medionan visual por yuda tene e atenshon di un ouditorio. Nan por krea un impreshon mas kla i duradero ku palabranan papiá so. Yehova a usa un variedat di medionan visual manera e streanan, un tayer di un trahadó di pòchi di klei, un mata i e tabernakel. (Gén. 15:5; Jer. 18:1-6; Jon. 4:6-11; Heb. 9:9, 23, 24)
5. Kon nos por usa medionan visual den sirbishi di vèlt? [9, be-PA pág. 248 §1–pág. 249 §2] Nos por usa plachi, mapa, liña di tempu i kálkulo matemátiko ku ta aparesé den nos publikashonnan i puntra e persona pa deskribí loke e ta mira. (Amos 7:7, 8; 8:1, 2) Tambe nos por usa nos vidionan pa siña hende bèrdatnan importante.
PARTI NUM. 1
6. Ki guia e Palabra di Dios ta duna en konekshon ku edukashon di yu? [1, w03-PA 15/3 pág. 12 §2; pág. 14 §4] Hesus por a lesa i skirbi pasobra for di su 12 aña, e por a hiba kòmbersashonnan profundo ku adultonan eduká. (Luk. 2:42, 46, 47) Tambe el a siña un fishi serka su tata di kriansa, Hosé. Mayornan a haña e responsabilidat di lanta nan yunan “den e disiplina i instrukshon di Señor,” i yuda nan “stima konosementu.” (Efe. 6:4; Pro. 12:1)
7. Kon Yehova a mustra interes den David komo hóben i kon David a mustra interes den Yehova? [2, w03-PA 15/4 pág. 29 §4; pág. 30 §3] Yehova a skohe David, yu menor di Isaí, komo futuro rei di Israel, pasobra El a mira ku e tin e potensial. (1 Sam. 16:7) I David tabata konstantemente konsiente di su relashon ku Yehova i a akudí na dje pa guia. (Sal. 25:4, 5)
8. Dikon Yehova a tuma nota di Abel su sakrifisio i kiko esaki ta sigurá nos? (Gén. 4:4) [3, w03-PA 1/5 pág. 28 §4–pág. 29 §1] Ounke hende por konsiderá Abel su sakrifisio komo algu simpel, el a skohe e mihó bestianan for di su tou. Esaki a representá lo mihó ku e tabatin pa ofresé. Abel mester a pensa seriamente riba su sakrifisio, siendo ku esei a reflehá su fe. (Heb. 11:4) Esaki ta sigurá nos ku Yehova ta tuma nota di nos “sakrifisio di alabansa” ora ku berdaderamente e ta wòrdu hasí ku fe i konvikshon di henter nos kurason. (Heb. 13:15, NW)
9. Kiko ta “e disiplina di SEÑOR” ku Proverbionan 3:11 ta spièrta nos pa no rechasá? [6, w03-PA 1/10 pág. 20 §2-4] Aki e no ta papiando di disiplina en general, sino di disiplina basá riba Dios su prinsipionan elevá. E disiplina aki por nifiká hopi kos—guia, instrukshon, entrenamentu, reprendementu, korekshon i asta kastigu. Nos no mester rechas’é pasobra e ta wòrdu motivá dor di amor i tin e propósito di siña, refiná i benefisiá nos. (Heb. 12:11)
10. Kiko e palabra “kontentamentu” menshoná na 1 Timoteo 6:6-8, ta nifiká? [8, w03-PA 1/6 pág. 9 §1-2; pág. 10 §1] E ta nifiká keda kontentu ku e kosnan básiko sin importá ki sirkunstansia nos haña nos mes aden, miéntras ku nos ta dependé riba Yehova i ta sirbié. Kontentamentu ta duna nos e satisfakshon ku ta bini dor di mantené nos sirbishi na Dios na promé lugá, sea ku nos tin tiki òf hopi kos material.
LESAMENTU SEMANAL DI BEIBEL
11. Kiko e laso di amor ku a uni Jonatan i David a prefigurá? (2 Sam. 1:26) [1, w89-S 1/1 pág. 26 §13] E laso di amor inkebrantabel ku a eksistí entre Jonatan i David ta meskos ku e union ku ta eksistí entre e “otro karnénan” i e restu di karné ungí ku huntu ta forma “ún tou” bou di “ún wardadó,” Hesus. (Juan 10:16)
12. Kiko nos por siña for di David su promé intento pa trese e arka di aliansa Yerusalèm? (2 Sam. 6:2-9) (1) Keda sin sigui instrukshon divino ta trese kalamidat. (2) Asta esnan ku tin un bon relashon ku Yehova tin biaha por reakshoná malu den situashonnan difísil. (3) Semper nos mester tira nos karga riba Yehova, i nunka no kulp’é pa problemanan ku ta surgi debí ku nos no a sigui su instrukshonnan. [2, w05-PA 15/5 “E Palabra di Yehova ta Bibu—Puntonan Sobresaliente di e Buki di Segundo Samuel”; w96-PA 1/4 pág. 28 §5–pág. 29 §1]
13. Despues ku David i Bètsabé a kometé piká, dikon nan yu mester a muri siendo ku Deuteronomio 24:16 i Ezekiel 18:20 ta bisa ku un yu no mester muri pa kousa di e eror di su tata? (2 Sam. 12:14; 22:31) Si ta huesnan humano a trata e kaso aki, tantu e mayornan komo e yu den barika lo a pèrdè nan bida. (Deu. 22:22) E pèrdida di e yu lo por a yuda David komprondé mas kla ainda kon malkontentu Yehova tabata ku e piká ku el a kometé. Ademas, nos no sa kon e estado di salú di e beibi resien nasí tabata. Pero nos por tin konfiansa ku Yehova a trata e asuntu na un manera hustu. [3, w05-PA 15/5 “Pregunta di Lektor”; w86-S 15/3 pág. 31]
14. Kon nos por sa ku loke Ziba a bisa tokante Mefi-boset tabata un mentira? (2 Sam. 16:1-4) Un kòmplòt ambisioso asina no a kuadra ku e karakter di un hòmber asina humilde i gradisidu manera Mefi-boset. Sin duda, e tabata bon na altura dje fieldat di su tata Jonatan. Ounke Jonatan tabata yu di Rei Saul, el a rekonosé humildemente ku ta David tabata esun ku Yehova a skohe komo rei riba Israel. (1 Sam. 20:12-17) Komo un amigu leal di David, Jonatan lo no a siña su yu yòn aspirá pa haña poder real. [5, w02-PA 15/2 pág. 15 nota na pia di pág.]
15. Dikon e reakshon di Mefi-boset riba e asuntu ku Ziba ta un bon ehèmpel pa nos? (2 Sam. 19:24-30) Ora ku a sali na kla ku Ziba a lanta kalumnia kontra Mefi-boset, David a korigí e eror parsialmente. Tòg, Mefi-boset no a protestá kontra David su desishon. El a enfoká mas bien riba e aspekto positivo, alegrando ku esun ku tabatin derecho di ta rei di Israel a regresá sano i salvo. En bèrdat Mefi-boset a pone un ehèmpel ekselente dor di wanta desabilidat, kalumnia i desepshon. [6, w02-PA 15/2 pág. 15 §12]