Repaso di Skol di Ministerio Teokrátiko
Lo konsiderá e siguiente preguntanan oralmente den e Skol di Ministerio Teokrátiko durante e siman ku ta kuminsá dia 30 di ougùstùs 2004. E superintendente di skol lo kondusí un repaso di 30 minüt basá riba e fuente di informashon ku a ser tratá den asignashonnan di e simannan di 5 di yüli te ku 30 di ougùstùs 2004. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Kon nos por splika e motibu di nos speransa “ku un genio suave i rèspèt profundo”? (1 Ped. 3:15, NW) [be-PA pág. 192 §2-4] Ora nos ta den sirbishi, lo no ta sabí pa hala atenshon na e erornan di un persona su opinion di tal manera ku bo ta ofendé su dignidat. Ta mihó pa puntra e doño di kas dikon e ta pensa asina i despues rasoná kuné a base di e Skritura. Ora nos ta papia for di plataforma, en bes di kritiká e ouditorio severamente òf papia ku nan komo si fuera nan ta inferior, nos mester apelá na nan amor pa Dios i nan deseo di sirbié.
2. Dikon ta importante pa papia ku konvikshon? (Rom. 8:38, 39; 1 Tes. 1:5; 1 Ped. 5:12) [be-PA pág. 194] Hende ta mira ku nos ta kere firmemente loke nos ta bisando. Nos konvikshon por indiká ku nos tin algu di gran balor pa kompartí ku nan, i e por yuda konvensé hende pa tuma na serio loke nos ta bisa i pa aktua di akuerdo kuné.
3. Kon nos ta demostrá konvikshon? [be-PA pág. 195 §3 pág. 196 §4] E palabranan ku nos ta usa por demostrá nos konvikshon. (Hab. 2:3; Juan 5:19, 24, 25; Rom. 8:38; 14:14; 1 Tim. 2:7) Si nos ta plenamente konvensí ku loke nos ta bisa ta bèrdat i ku e ta importante pa nos ouditorio tend’é, e ora ei nos ekspreshon di kara, nos gestonan, nos postura i moda di hasi i aktua lo demostrá esaki.
4. Kiko ta takto, dikon e ta importante, i kon nos por mustra takto i tòg ser firme? (Rom. 12:18) [be-PA pág. 197] Takto ta e abilidat di por trata ku hende sin ofendé nan innesesariamente. Si nos ta papia ku takto, hende lo ta mas dispuesto pa skucha e bon nobo ku mente habrí. Nos por mustra takto i tòg ser firme dor di kòrda ku ni maske kon nos presentá e mensahe di Beibel, tòg tin hende ku lo sinti nan mes ofendí dor di e mensahe. (1 Ped. 2:7, 8)
5. Kiko un persona ku tin takto lo konsiderá promé ku e papia? (Pro. 25:11; Juan 16:12) [be-PA pág. 199] Takto ta enserá ku hopi bes nos mester determiná e momentu korekto pa bisa un kos. Kisas nos no ta di akuerdo ku tur loke un persona ta bisa, pero nos no tin nodi ekspresá esei kada bes ku su opinion no ta kuadra ku Beibel. Mas bien, konsiderá e opheshonnan di un persona komo un bon chèns pa konosé su manera di pensa. Ora ku ta posibel, duna e personanan ku bo ta papia kuné un elogio pa nan fervor religioso. (Echo. 17:22)
PARTI NUM. 1
6. Kon nos kòmbersashon i kustumbernan di studia Beibel por indiká te na ki grado nos a hasi progreso den e bèrdat? [be-PA pág. 74 §3 pág. 75 §2] Personanan ku a bisti e personalidat nobo no ta laga mentira, kosnan vulgar ni komentarionan negativo sali for di nan boka, ma mas bien nan kòmbersashon ta ‘bon pa edifikashon di esnan ku ta tende nan.’ (Efe. 4:24, 25, 29) Esnan ku a komprondé e bèrdat kabalmente no ta bai kita tempu for di nan debernan pa ku Dios pa nan por sigui tras di ideanan nobo, kousanan ku sierto movementunan ta boga p’e òf formanan di dibertishon ku mundu ta promové. (Efe. 3:18; 4:14) E manera ku nos ta trata otro hende, tambe por ta un indikashon di nos progreso spiritual. (Efe. 4:32)
7. Kiko Beibel ke men ku ‘hasi bon uso di boso tempu,’ i kon nos por hasi esei? (Efe. 5:16) [w02-PA 15/11 pág. 23] Esaki ta nifiká stòp di dediká tempu na kosnan di ménos importansia, i usa nos tempu den un manera mas probechoso. Dor di baha man na e tempu ku nos ta dediká na wak televishon, sùrf riba Internet, lesa literatura di mundu òf na kore demasiado tras di rekreo i dibertishon, nos lo tin mas tempu disponibel pa “loke ta importante di bèrdè.” (Fil. 1:9, 10, BPK ) Un di e kosnan importante ta studio personal di Beibel, lokual ta kontribuí na nos kresementu spiritual i na un relashon mas será ku Yehova. (Sal. 1:1-3)
8. Kon e Skritura ta mustra bon kla ku tur hende ta igual dilanti di Dios, i ki efekto esaki mester tin riba nos sirbishi? [w02-PA 1/1 pág. 5 i 7] Echonan 17:26 ta deklará: “For di ún sanger [Dios] a traha tur nashon di hende.” E Kreadó no ta hasi distinshon di persona a base di diferensianan den posishon sosial òf sirkunstansia. (Jòb 34:19) Den morto, tur hende ta den mesun kondishon. (Sal. 49:10; Ekl. 9:5, 10) Tur persona ku ta ehersé fe den Hesukristu tin e oportunidat di risibí bida eterno. (Juan 3:16) Tur esaki mester motivá nos pa prediká e bon nobo na “tur hende” sin hasi distinshon. (1 Tim. 2:4)
9. Kiko ta e nifikashon di e Kreadó su nòmber úniko, Yehova? [w02-PA 15/1 pág. 5] Dios su nòmber literalmente ta nifiká “E Ta Kousa pa Bira.” Esei ta indiká ku e ta resultá di ta loke sea ta nesesario p’e kumpli ku su propósito. (Eks. 3:14, NW ) Esaki ta bisto na e kantidat di título ku Yehova ta karga. (Hues. 11:27; Sal. 23:1; 65:2; 73:28, NW; 89:26; Isa. 8:13; 30:20, NW; 40:28; 41:14) Ta solamente e Dios berdadero tin derechi di karga e nòmber Yehova, pasobra e so sigur-sigur por kumpli ku su propósito. (Isa. 55:10, 11)
10. Kiko a hasi e sakrifisio di Abel “un mihó sakrifisio” ku esun di Kain, i ki lès nos por siña for di esaki relashoná ku nos “sakrifisio di alabansa”? (Heb. 11:4; 13:15) [w02-PA 15/1 pág. 21 §6-8] Ounke tantu Kain komo Abel a rekonosé nan estado pekaminoso i a deseá di haña Dios su fabor, Abel a ofresé su sakrifisio motivá pa fe. Kain probablemente no a pensa mashá riba su ofrenda i a present’é na Dios djis pa formalidat. Pa nos “sakrifisio di alabansa” den sirbishi ta balioso pa Dios, e mester ta un ekspreshon di amor i fe i no simplemente un formalidat. (Rom. 10:10)
LESAMENTU SEMANAL DI BEIBEL
11. Kon Levítiko 18:3 por yuda nos evitá di haña un sentido trosí di loke ta bon i loke ta malu? (Efe. 4:17-19) [w02-PA 1/2 pág. 29] Nos no mester kana meskos ku e nashonnan ta kana, lokual ke men ku nos no ta permití e sentido trosí ku e nashonnan tin di loke ta bon i loke ta malu, korumpí nos konsenshi basá riba Beibel.
12. Kiko e ‘dos pannan’ ku e sumo saserdote tabata presentá komo “un ofrenda di zoyamentu” durante e Fiesta di Simannan (Pentekòste), a representá profétikamente? (Lev. 23:15-17) [w98-PA 1/3 pág. 13 §21] E dos pannan ku zürdeg tabata trahá di e promé frutanan di e kosecha di trigu. E pannan aki a prefigurá e 144.000 hendenan imperfekto ku Hesus “a kumpra pa Dios” pa sirbi komo ‘un reino i saserdotenan pa reina riba tera.’ (Rev. 5:9, 10; 14:1, 3) E dos pannan ku zürdeg kisas ta prefigurá tambe e echo ku e gobernantenan selestial aki ta bin di dos ramo di humanidat pekaminoso, hudiu i no-hudiu (gentil).
13. Den un kaso di adulterio manera ta ser menshoná na Numbernan kapítulo 5, den ki sentido e muhé kulpabel su “hep lo seka”? (Num. 5:27) [w04-PA 1/8 pág. 24 §6; w84-S 15/4 pág. 29] Evidentemente, “hep” ta ser usá akinan komo un palabra nèchi pa e órganonan di prokreashon. “Seka” ta indiká ku lo ta imposibel pa konsebí. Esaki lo ta na armonia ku e echo ku si e muhé tabata inosente, su esposo lo tabatin ku sak’é na estado.
14. Dikon Miriam ku Aaron a papia kontra Moisés pa motibu di su kasá kusita? (Num. 12:1) Miriam kier a haña mas prestigio i outoridat. Kisas el a bira muchu preokupá ku e ta bai pèrdè un poko di su prominensia debí na su supuesto rival. Miriam a logra konvensé Aaron pa djòin e. I huntu nan a kritiká Moisés pasobra el a kasa ku un kusita i tambe nan a desafiá e posishon úniko ku Moisés tabatin dilanti di Dios. Pa e motibunan aki Yehova a kastigá tantu Miriam komo Aaron; pero e echo ku ta Miriam so a ser kastigá ku lepra lo por indiká ku t’e tabata e instigadó. [7, w02-PA 15/10 pág. 29; w84-S 15/4 pág. 29-30]
15. Kiko tabata “e buki di Gueranan di SEÑOR”? (Num. 21:14) E tabata un registro históriko konfiabel di e gueranan di e pueblo di Yehova. Posiblemente el a kuminsá ku Abraham su guera eksitoso kontra e kuater reinan ku a kapturá Lòt i su famia. (Gén. 14:1-16) Tambe kisas el a dokumentá kombatenan militar ku no ta pará skirbí den Beibel. [9, cl-PA pág. 64; w90-S 1/7 pág. 20, 23; it-2-S pág. 233]