Yehova “Ta Mi Yudadó”
1 Ora Hesus a duna su promé disipelnan e tarea di prediká, el a bisa nan: “Mira! Mi ta manda boso manera karné meimei di lobo.” (Mat. 10:16) Esei a pone nan haña miedu i keda sin prediká? Nò. Nan a adoptá e aktitut ku mas despues apòstel Pablo a ekspresá ora el a bisa su kompañeronan kristian: “Bisa ku tur konfiansa: ‘SEÑOR ta mi yudadó; lo mi no tin miedu. Kiko hende por hasi mi?’” (Heb. 13:6) Nan a alegrá di a wòrdu konsiderá digno pa sufri bèrgwensa pa kousa dje nòmber di Hesus, i nan a sigui siña i deklará e bon nobo sin stòp.—Echo. 5:41, 42.
2 Awe e predikashon mundial ta den su fase final. Nèt manera Hesus a predisí, nos a bira opheto di odio di parti di tur nashon. (Mat. 24:9) Hende a oponé i ridikulisá nos trabou di prediká, i den algun parti dje tera, asta el a ser prohibí. Si nos tabata falta fe, nos lo por a sinti nos intimidá. Sin embargo, sabiendo ku Yehova ta nos Yudadó, ta refreská nos i ta fortalesé nos pa perseverá.
3 E kualidat di kurashi ta nifiká ser fuerte, intrépido i balente. E ta lo kontrario di miedu, timides, kobardia. E disipelnan di Hesus semper tabatin mester di kurashi pa perseverá. E ta esensial si nos kier evitá di ser desanimá dor dje aktitut i akshonnan di un mundu ku ta na enemistat ku Dios. Ki animante ta pa nos pensa riba e ekselente ehèmpel di Hesus, un vensedó di mundu! (Juan 16:33) Kòrda tambe e apòstelnan ku a deklará yen di kurashi ora nan a enfrentá pruebanan severo: “Nos mester obedesé Dios mas ku hende.”—Echo. 5:29.
4 Nos No Ta di Esnan ku Ta Hala Atras: Nos mester hasi esfuerso pa mantené un aktitut positivo pa ku nos trabou. (Heb. 10:39) Semper tene na mente ku Yehova ta manda nos bai prediká komo un ekspreshon di su amor i miserikòrdia pa ku henter humanidat. Nunka e ta pidi su sirbidónan hasi algu ku no ta sirbi un propósito útil. Tur kos ku nos ta asigná pa hasi, al final lo ta pa e bienestar di esnan ku ta stima Dios.—Rom. 8:28.
5 Un punto di bista optimista lo yuda nos sigui buska hende mansu manera karné den nos teritorio. Nos lo por mira e apatia ku hendenan ta desplegá komo un ekspreshon di nan frustrashon i desesperashon. Laga nos amor impulsá nos pa tene pasenshi i ser komprensivo. Kada biaha ku nos laga literatura òf detektá un chispa di interes, nos meta mester ta pa hasi un rebishita umbes i stimulá mas interes. Nunka nos mester duda di nos abilidat di kuminsá un studio di Beibel òf di ta efikas den kondusié. Mas bien, konstantemente i ku orashon nos mester buska Yehova su yudansa i guia, teniendo konfiansa ku lo e yuda nos.
6 Nos ta kere firmemente ku Yehova lo sòru p’e trabou sigui te ora e trabou keda kla. (Kompará ku Filipensenan 1:6, NW.) Nos konfiansa total den dje komo nos Yudadó ta fortalesé nos, di manera ku nos ‘no ta kansa di hasi loke ta bon.’—Gal. 6:9.