Repaso di Skol di Ministerio Teokrátiko
Lo konsiderá e siguiente preguntanan oralmente na e Skol di Ministerio Teokrátiko durante e siman ku ta kuminsá dia 25 di ougùstùs 2003. E superintendente di skol lo kondusí un repaso di 30 minüt basá riba e fuente di informashon ku a ser tratá den asignashonnan di e simannan di 7 di yüli te ku 25 di ougùstùs 2003. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Kua ta e benefisionan di establesé kontakto visual ora nos ta trahando den sirbishi? [2, be-PA pág. 125 §1-2; pág. 125 kuadro] Un mirada ku ta reflehá amabilidat i rèspèt por laga e personanan sa ki klase di hende bo ta i ta yuda nan sinti nan mas trankil. Kontakto visual apropiá por duna bo tambe un indikashon kon pa trata ku vários situashon.
2. Kiko bo por hasi si bo ta bira nervioso promé ku bo sali den sirbishi? [4, be-PA pág. 128 §4-5] Fuera di prepará kuidadosamente i hasi orashon ferviente na Yehova, pensa riba e miserikòrdia ku Yehova ta mustra dor di invitá hende pa gosa di bida eterno den Paradeis; siña konsentrá riba e nesesidatnan di otro hende. Ta bon pa kòrda tambe ku hende ta liber pa skohe, pues nan por sea aseptá òf rechasá e mensahe. Nos tarea ta simplemente pa prediká. (Mat. 24:14; Echo. 4:29)
3. Kiko lo yuda bo papia na un manera natural i estilo di kòmbersashon ora bo ta duna un diskurso for di plataforma? [5, be-PA pág. 129 §2; pág. 129 kuadro] Dor di konsentrá mas riba e ideanan i no riba e palabranan eksakto, bo ta kontribuí na un presentashon natural, manera bo ta papia tur dia. E presentashon por bira steif i formal si un persona siña su diskurso for di kabes òf si su notanan ta muchu detayá.
4. Ki efekto e prinsipionan ku nos ta haña na Levítiko 16:4, 24, 26, 28; Juan 13:10 i Revelashon 19:8 tin riba nos aparensia personal, i dikon esaki ta importante? [7, be-PA pág. 131 §3; pág. 131 kuadro] Beibel ta animá nos pa sòru pa nos kurpa i nos paña ta limpi, spesialmente ora nos ta bai reunion òf ta sali den sirbishi di vèlt. Nos aparensia personal por influensiá e opinion ku hende ta forma di nos kreensianan kristian i di e estilo di bida ku nos ta representá.
5. Deskribí un persona “desente i moderá” i ku tin sano huisio. (1 Tim. 2:9, 10) [8, be-PA pág. 132 §1] Un persona desente i moderá no ke ofendé otro hende innesesariamente ni hala demasiado atenshon na su mes. Un persona ku tin sano huisio ta moderá i diskreto. E ta respetá e normanan di Dios i ta dispuesto pa apliká prinsipionan bíbliko den su bida.
PARTI NUM. 1
6. Ounke kristiannan mester soportá otro ku pasenshi, kiko sí nan no ta tolerá den nan? (Kol. 3:13) [3, w01-PA 15/7 pág. 22 §7-8] Kristiannan di ningun manera ta aprobá malecho, ni nan no ta sera wowo pa eror. (Gal. 6:1)
7. Korekto òf Inkorekto: Un numeral ordinal (rangtelwoord) ta un sifra kompletu. Splika. [4, si-S pág. 282 §24-5; km-PA 4/03 pág. 4] Inkorekto. Un numeral ordinal ta indiká e posishon den un seri, manera promé, di dos, di tres (“eerste, tweede, derde”), pero e no ta indiká un sifra kompletu òf hinté. Por ehèmpel, na idioma hulandes ora nan ta referí na siglo 21 (“eenentwintigste eeuw”), nan no ke men ku 21 siglo kompletu a pasa kaba. Na kontraste, un numeral kardinal (“hoofdgetal”) sí ta un sifra kompletu òf hinté.
8. Kua ta e motibu mas puru ku nos por tin pa lesa e Palabra di Dios, i dikon ta importante pa nos tin tal motivashon? [5, be-PA pág. 24 §1] Amor pa Yehova ta e motibu mas puru ku nos por tin pa lesa su Palabra. Stimando Yehova ku ‘henter nos mente’ lo motivá nos pa probechá tur ku tin di nos kapasidat mental pa atkerí e konosementu di Dios. (Mat. 22:37)
9. Kon un persona sabí ta “montoná sabiduria” òf ta ward’é manera un tesoro? (Pro. 10:14) [6, w01-PA 15/7 pág. 27 §4-5] E mester yena su mente ku e konosementu edifikante di Dios ku ta ser hañá den “tur [e] Skritura.” (2 Tim. 3:16, 17) Tambe e konosementu di e Skritura mester yega na su kurason dor di meditá regularmente.
10. Dikon e bon kustumbernan di Jòb ta digno di menshon? (Jòb 1:1, 8; 2:3, NW) [7, w01-PA 1/8 pág. 20 §4] Jòb su bon kustumbernan a yuda hasié un hòmber “sin kulpa i rekto.” E tabatin e kustumber di aktua komo e saserdote di famia i a ofresé sakrifisio na fabor di su yunan. (Jòb 1:5) Den e famia di Jòb, kustumbernan ku a konsentrá riba e adorashon di Yehova tabatin un lugá prominente.
LESAMENTU SEMANAL DI BEIBEL
11. Kon bini e miembronan di e kuerpo gobernante a logra yega unánimamente na “ún akuerdo,” esta, ku no tabatin nodi sirkunsidá kreyentenan no-hudiu pa nan por wòrdu salbá? (Echo. 15:25) Na promé lugá, Pedro a konta ku Dios a duna spiritu santu na e kreyentenan no-hudiu i insirkunsidá, refiriendo na e kombertimentu di Cornelio i su famia di kas. (Echo. 15:7-9) Despues, Barnabas ku Pablo a konta e eksperensianan ku nan tabatin entre e hendenan di e nashonnan pagano ku a bira kreyente. (Echo. 15:12) Por último, Santiago a referí na Amos 9:11 i 12. (Echo. 15:13, 16) Pues, kosnan ku tabata un echo i e Skritura inspirá a demostrá bon kla kua ta e desishon korekto. [1, w90-S 15/6 pág. 13 §14-15]
12. Kon e kuerpo gobernante por a pidi Pablo kumpli ku sierto stipulashonnan di e Lei di Moisés, miéntras ku ya Yehova a kanselá e Lei ei? (Echo. 21:20-26) [2, it-2-S pág. 242 §5; it-2-S pág. 1214 §3-4 (it-1-E pág. 481 §3; it-2-E pág. 1163 §6–pág. 1164 §1)] E Lei di Moisés tabata e lei nashonal di Judea. Ora ku sierto kustumbernan asosiá ku e Lei ei no a violá prinsipionan kristian ni tabata un rechaso di doktrina kristian, e kristiannan di promé siglo no a haña ku esei a kousa un konflikto i a kumpli ku kustumbernan hudiu pa asina nan no ofendé otro hende innesesariamente.
13. Ki akusashonnan falsu presentá kontra apòstel Pablo ta laga nos kòrda riba remarkenan ekspresá kontra Testigunan di Yehova den último tempu? (Echo. 24:5, 6) [3, w01-PA 15/12 pág. 22 §7–pág. 23 §2] E oponentenan di Pablo a akus’é di aktividatnan supversivo, peligroso pa estado, ku a kousa disturbio sivil bou di e pueblo en general. Tambe nan a pretendé ku e tabata lider di un kulto masha straño, pasobra kristianismo tabata otro for di kreensia tradishonal hudiu. Ademas, nan a akus’é di a violá e lei ku a prohibí di trese pagano den e patio di tèmpel reservá pa hudiu so.
14. Kon Pablo a pone un bon ehèmpel komo proklamadó di Reino asta ora e tabata bou di aresto di kas pa dos aña? (Echo. 28:30, 31) Ounke bou di restrikshon, Pablo a hasi loke e tabata por den e sirkunstansia ei, i a prediká i siña e hendenan ku “tur frankesa.” For di prizon el a skirbi kartanan inspirá na e efesionan, filipensenan, kolosensenan i na e kristiannan hebreo i tambe na Filemon. [4, w90-S 15/6 pág. 25 §20; Rbi8-S pág. 13 lista]
15. Den ki sentido “e outoridatnan ku ta goberná” ta parti di “e ordenansa [areglo] di Dios,” i ki efekto esaki mester tin riba kristiannan? (Rom. 13:1, 2) [8, w00-PA 1/8 pág. 4 §5] Dios ta permití gobièrnunan polítiko di hende eksistí temporalmente i ehersé un sierto grado di outoridat te asina leu ku esei ta kuadra ku Dios su propósito. Kristiannan ta someté nan mes boluntariamente na e outoridat di gobièrnu tanten e no ta surpasá e límitenan di Dios su boluntat pa nan.