Gratitut pa Dios Su Miserikòrdia
1 Promé ku apòstel Pablo a bira un kristian, e tabata violentamente kontra pa kristianismo plama. Sin embargo, dor ku el a aktua den ignoransia, miserikòrdia a ser mustrá na dje. Yehova a demostrá bondat inmeresí na Pablo i a dun’é e asignashon balioso di prediká. Pablo a apresiá e asignashon ei mashá. (Echo. 26:9-18; 1 Tim. 1:12-14) Pablo su gratitut pa e miserikòrdia ku Yehova a mustra na dje a motiv’é pa sakrifiká su mes pa kumpli ku su ministerio.—2 Kor. 12:15.
2 Dios a duna nos tambe un ministerio komo muestra di su miserikòrdia. (2 Kor. 4:1) Meskos ku Pablo, nos tambe por demostrá nos apresio pa e miserikòrdia mustrá na nos dor di hasi tur nos posibel pa yuda otro hende progresá spiritualmente. Un manera ku nos por hasi esaki ta dor di kuminsá i kondusí studio di Beibel.
3 Kon pa Kuminsá Studio di Beibel: Un manera pa kuminsá studio di Beibel ta dor di establesé un ruta di revista. Segun ku regularmente nos ta bishitá e personanan riba nos ruta, nos ta haña sa loke ta preokupá nan. Ku tempu, nos por usa un artíkulo den un dje revistanan komo un medio pa introdusí un studio di Beibel den e foyeto Rekerí. Durante e siguiente bishitanan, ora nos bolbe pa entregá revista na e doño di kas, kisas nos ta haña oportunidat pa sigui e konsiderashon den e foyeto Rekerí.
4 Orashon i Esfuerso Ta Nesesario: Orashon huntu ku esfuerso diligente lo mehorá nos aktividat di prediká. Un ruman muhé pionero ku tabatin un studio di Beibel a resa pidi Yehova pa bendishon’é ku mas studio. El a aktua tambe konforme ku su orashonnan. Ora el a hasi un análisis profundo di su sirbishi, el a ripará ku e no tabata ofresé e hendenan studio di Beibel ora e rebishitá nan. El a kuminsá hasi esei, i no a dura mashá ku el a haña dos studio mas.
5 Nos ta masha privilegiá di por yuda hende konosé “e bon nobo di e bondat inmeresí di Dios”! (Echo. 20:24, NW) Laga nos gratitut pa Dios su miserikòrdia motivá nos pa ta diligente den yuda otro hende benefisiá di Yehova su bondat inmeresí.