Baha ku Penshon—Un Porta na Mayor Aktividat?
1 Hopi hende ku ta traha duru ta anhelá e dia ku nan por baha ku penshon i asina libra nan mes di e peso i preshon di nan trabou. Sin embargo, hopi bes ora nan baha ku penshon nan ta bira hende ku no ta interesá den nada, ta sinti nan laf i ta bira bieu promé ku nan tempu. Si un persona no ta okupá ku un aktividat ku tin un propósito, na final di kuenta e por hañ’é ta preokupá so tokante su mes. Un korant di Brazil a informá ku empleadonan públiko ku baha ku penshon ta keha di e siguiente problemanan: ‘falta di satisfakshon, mal beis, insiguridat, pèrdida di identidat, depreshon i e sensashon ku nan mundu ta bashando den otro.’
2 Na kontraste, pa hopi kristian e fase nobo aki den nan bida ta manera un porta ku ta hiba na mayor aktividat spiritual. Un ruman hòmber ku a kuminsá traha pionero dos siman despues ku el a hasi 65 aña, a bisa: “Nunka mi a eksperensiá un periodo den mi bida asina riku na bendishon manera e último dies añanan aki ku mi a traha pionero.” Un pareha a skirbi: “Nos berdadero añanan di oro a start ora nos a kuminsá traha pionero.” Sí, pa hopi ruman un oportunidat di oro ta habri pa nan ora nan baha ku penshon: nan por ekspandé nan sirbishi i kosechá bendishonnan riku for di Yehova.
3 Mantené Bo Mes Okupá i Produktivo: Hopi ruman ku awor ta ku penshon, a lanta sin e komodidatnan ku ta normal awe i nan a siña traha duru for di chikí. Ounke kisas nan no tin e vigor di hubentut, ainda nan ta trahadónan masha produktivo. Den e teritorio di un sierto sukursal, 22 porshento di e pioneronan—mas o ménos 20.000 ruman—tin 60 aña bai ariba. E rumannan di edat aki ta duna un kontribushon grandi na e trabou di prediká. Nan eksperensia i kualidatnan ku ta agradá Dios, ta enrikesé e kongregashonnan kaminda nan ta sirbi.—Sant. 3:17, 18.
4 Kedando okupá den e sirbishi kristian ta kontribuí na un mihó salu i un mihó kalidat di bida. Un ruman muhé di 84 aña ku a kuminsá traha pionero tempu el a baha ku penshon, a bisa: “Studia Beibel ku vários persona interesá a yuda mi keda mentalmente aktivo. Komo ku mi no tin outo, mi ta kana hopi i esei ta tene mi salú.” Un pareha pionero di edat a remarká: “Sirbishi ta mantené nos den bon kondishon mentalmente i físikamente. Semper nos ta huntu. Nos ta hari hopi i ta disfrutá di bida.”
5 Sirbiendo Kaminda Tin Nesesidat: Algun kristian ku a baha ku penshon i ku tin sirkunstansianan finansiero faborabel a muda bai sirbi kaminda tin mas nesesidat di predikadónan di Reino. Algun otro a ekspandé nan sirbishi dor di sirbi den e kampo di idioma stranhero. E publikadónan seloso aki, meskos ku apòstel Pablo, “ta hasi tur kos pa kousa di evangelio, pa [nan] por tuma parti den dje.”—1 Kor. 9:23.
6 Un pareha a kuminsá traha pionero despues ku nan a lanta nan dos yu hòmbernan. Despues ku nan tabatin vários aña ta traha pionero, nan a kuminsá siña idioma chines. Awor nan tin 70 i piku aña, i poko tempu pasá nan tabatin e goso di mira e grupo chines ku nan tabata traha kuné bira un kongregashon. Parehanan asina ta un bendishon grandi!
7 Nos No Ta Baha ku Penshon di Sirbishi: Mayoria hende ku tempu ta baha ku penshon di nan trabou. Kristiannan sí no ta baha ku penshon di nan sirbishi na Dios. Nan tur mester sigui fiel “te na fin.” (Mat. 24:13, 14) Klaru ku segun ku nan edat ta subi, algun ruman no por hasi mes tantu ku nan tabata hasi na ántes den Yehova su sirbishi. Pero ta un gran animashon pa mira nan hasi loke nan por, di henter nan alma! E Palabra di Dios ta garantisá nan ku Yehova lo no lubidá nan trabou ni e amor ku nan a mustra pa su nòmber.—Luk. 21:1-4; Heb. 6:10.
8 Si bo ta yegando e edat pa baha ku penshon, dikon bo no ta hasi orashon i pensa riba kon bo por probechá plenamente di bo sirkunstansianan nobo? Ku Dios su yudansa, lo bo por deskubrí ku ora bo baha ku penshon esei ta habri un porta ku ta hiba na mayor aktividat, alabansa na Yehova i hopi bendishon.—Sal. 148:12, 13.