Desabilitá, i Tòg Produktivo
1 Si bo ta un di e hopi Testigunan di Yehova ku tin un desabilidat òf hèndikèp físiko, tòg bo por tin un sirbishi produktivo. De echo, bo sirkunstansianan kisas ta duna bo oportunidatnan spesial pa duna testimonio i animá otro hende.
2 Oportunidat pa Duna Testimonio: Hopi hende ku tin ku lucha ku un desabilidat ta partisipando plenamente den sirbishi. Por ehèmpel, un ruman muhé ku no por a papia ni kana bon mas despues di un operashon, a deskubrí ku e tambe por laga revista si su kasá parker nan outo serka di un asera kaminda hopi hende ta pasa. Na un okashon, el a laga 80 revista den apénas dos ora! Bo sirkunstansianan spesial kisas ta pone ku bo ta topa hende ku di otro manera ta difísil pa haña. Si ta asina, konsiderá nan komo bo teritorio spesial.
3 Bo predikashon por ta masha efektivo! Segun ku otro hende ta opservá bo determinashon i e bon efekto ku e bèrdat di Beibel tin riba bo bida, nan por sinti nan atraí na e mensahe di Reino. Ademas, ora bo topa hende ku ta haña nan ku kontratempu, bo eksperensia den bida ta prepará bo pa duna nan konsuelo for di e Palabra di Dios.—2 Kor. 1:4.
4 Fortalesé Otro Hende: Abo no a ser animá dor di e relato di bida di Laurel Nisbet, kende tabatin ku biba pa 37 aña den un mashin pa hala rosea i tòg a yuda 17 persona haña konosementu eksakto di e bèrdat di Beibel? Di igual manera, bo ehèmpel por inspirá rumannan den fe pa hasi esfuerso den e sirbishi di Yehova.—g93-S 22/1 pág. 18-21.
5 Asta si bo sirkunstansianan ta stroba bo di sali den sirbishi manera bo ke, ainda bo por fortalesé otro hende. Un ruman hòmber a bisa: “Mi a siña ku asta un persona ku un desabilidat grandi por ta di gran yudansa pa otronan. Ami ku mi kasá ta un sorto di anker pa vários ruman den kongregashon. Debí na nos sirkunstansia, semper nos ta na kas, semper nos ta disponibel.” Sin embargo, ta di komprondé ku debí na bo desabilidat kisas bo no por hasi semper di akuerdo ku e selo ku bo tin. Pero tòg, ku un poko yudansa lo bo por tin un partisipashon aktivo den sirbishi. P’esei, si bo tin mester di poko yudansa, no vasilá pa menshoná esaki na e ansianonan i na otro rumannan den kongregashon ku por duna bo un man.
6 Yehova ta mira tur loke bo ta hasi pa por sirbié, i e ta kontentu ku bo sirbishi di henter alma. (Sal. 139:1-4) Segun ku bo ta dependé riba dje, e por duna bo e poder pa bo tin un sirbishi produktivo i signifikativo.—2 Kor. 12:7-10.