Konfiá ku e Bon Nobo
1 Ta un onor pa a ser konfiá ku e bon nobo—e evangelio—di Dios! (1 Tes. 2:4) Ounke kisas algun hende ta rechasá e mensahe poderoso aki, esnan di kurason onrado ta ser atraí na dje komo si fuera na un holó dushi. (2 Kor. 2:14-16) E bon nobo ta nifiká salbashon pa e hendenan ku asept’é i obedes’é. (Rom. 1:16) Kon nos mester kumpli ku e enkargo spesial aki?
2 Hesus i e Apòstelnan: Hesus a pone predikashon di e bon nobo na promé lugá. (Luk. 4:18, 43) Asta ora Hesus tabata kansá i ku hamber, su amor pa hende i su apresio pa e mensahe a motiv’é pa kompartí e bon nobo ku otronan. (Mar. 6:30-34) Mediante su palabranan i ehèmpel, el a graba den mente di su disipelnan e importansia di e trabou di prediká e Reino.—Mat. 28:18-20; Mar. 13:10.
3 E apòstelnan a imitá Hesus i yen di entusiasmo nan a deklará e mensahe di Reino. Asta ora a suta nan i taha nan di prediká, ‘nan a sigui siña hende i prediká’ e bon nobo. (Echo. 5:40-42) Apòstel Pablo a traha inkansablemente den e trabou aki. (1 Kor. 15:9, 10; Kol. 1:29) El a kompará e privilegio di kompartí e bon nobo ku un debe ku e tabatin ku su próhimo, i e tabata dispuesto na sakrifiká komodidat personal afin di por paga e debe ei.—Echo. 20:24; Rom. 1:14-16.
4 Nos Privilegio Awe: Apresio pa e tarea sagrado konfiá na nos lo motivá nos pa buska maneranan pa partisipá mas tantu ainda den e trabou di prediká. (Rom. 15:16) Edward, kende tabata den ròlstul, tabatin e kustumber di sinta na entrada di un hotèl pa papia ku e huéspetnan tokante su kreensianan religioso. Pero e kier a hasi mas. P’esei el a laga traha un kabina spesial riba un pikòp, i ku e vehíkulo ei el a sirbi komo pionero pa hopi aña, biahando míles di kilometer pa prediká. Meskos ku Edward, tin hopi ruman awe ku a hasi ahuste den nan sirkunstansia pa asina nan por partisipá mas tantu den e trabou di plama e bon nobo.
5 Laga nos awe imitá Hesus i e apòstelnan dor di semper pone e trabou di prediká na promé lugá den nos bida. Dor di hasi esei, nos ta demostrá nos amor pa hende i tambe nos apresio pa e bon nobo konfiá na nos.