Kumpli ku Nos Dedikashon
1 Sea ku bo a batisá resientemente òf hopi tempu pasá, probablemente bo ta kòrda e okashon importante aki den bo bida. Nos boutismo no ta e fin, sino mas bien, e prinsipio di un bida di sirbishi dediká ku por dura pa semper. (1 Huan 2:17) Kiko por yuda nos kumpli ku nos dedikashon?
2 Sigui Kristu Su Ehèmpel: Despues di su boutismo, Hesus “a kuminsá su ministerio” predikando tokante “e reino di Dios.” (Luk. 3:23; 4:43) Di igual manera, ora nos a simbolisá nos dedikashon na Yehova mediante boutismo, nos a bira ministernan ordená di e bon nobo. Podisé nos tin ku dediká hopi tempu i esfuerso pa haña djis e nesesidatnan di bida, pero nos trabou prinsipal ta e ministerio kristian. (Mat. 6:33) En bes di hasi esfuerso pa bira riku òf haña prestigio, esnan dediká na Dios ta purba ‘glorifiká nan ministerio,’ meskos ku apòstel Pablo a hasi. (Rom. 11:13, NW) Bo ta apresiá bo privilegio di sirbi Yehova i bo ta hasi bo máksimo esfuerso pa kumpli kuné?
3 Meskos ku den e kaso di Hesus, nos tin ku “resistí Diabel.” (Sant. 4:7) Satanas a tenta Hesus despues di su boutismo, i di igual manera e ta mek riba Yehova su sirbidónan dediká djawe. (Luk. 4:1-13) Dor ku nos ta rondoná pa Satanas su mundu, nos mester dominá nos mes, i keda leu for di kualkier kos ku por kontaminá nos mente òf nos kurason. (Pro. 4:23; Mat. 5:29, 30) E konseho na kristiannan ta pa nan no “tuma parti na e mesa di Señor i na e mesa di demoñonan.” (1 Kor. 10:21) Esaki ta nifiká ku nos tin ku protehá nos mes di dibertishon insaludabel, mal kompania i peligernan riba Internet. Ademas nos tin ku keda leu for di tur informashon apóstata. Dor di vigilá e kosnan aki i otro táktikanan di Satanas, nos lo por kumpli ku nos dedikashon.
4 Hasi Uso di Dios Su Provishonnan: Pa yuda nos kumpli ku nos dedikashon, Yehova ta duna nos yudansa mediante su Palabra i e kongregashon kristian. Hasi lesamentu di Beibel i orashon na Yehova parti di bo rutina diario. (Hos. 1:8; 1 Tes. 5:17) Disfrutá di e reunionnan di kongregashon. (Sal. 122:1) Asosiá ku esnan ku ta teme Yehova i warda su mandamentunan.—Sal. 119:63.
5 Ku Yehova su yudansa, bo por kumpli ku bo dedikashon na dje i tambe tin e goso di sirbié pa semper.—Sal. 22:26, 27; Fil. 4:13, NW.