Dependé Riba Jehova pa Haña Fortalesa
1 Tin hopi motibu pakico nos tin cu dependé riba Jehova. Por ehempel, ta un desafio pa predicá e bon nobo “den tur e tera habitá.” (Mat. 24:14) Tambe nos tin un lucha constant contra nos carni imperfecto. (Rom. 7:21-23) Fuera di eseinan, “nos tin un lucha . . . contra e gobernantenan mundial [sobrehumano] dje scuridad aki.” (Efe. 6:11, 12) Ta bisto anto cu nos tin mester di yudansa. Con nos por obtené fortalesa for di Jehova?
2 Mediante Oracion: Jehova ta duna su poderoso spiritu santu libremente na su sirbidónan cu pidié. (Luc. 11:13) Bo ta duda den bo abilidad di duna testimonio di cas pa cas, riba caya of via telefon? Bo ta tímido pa predicá informalmente? Indiferencia dje hendenan den bo teritorio a fria bo celo? Kico si bo ta ser preshoná pa comprometé bo fe? Dependé riba Jehova. Pidié fortalesa.—Fil. 4:13.
3 Mediante Studio Personal: Nos ta haña fortalesa dor di come cuminda. Asina tambe nos ta ser fortificá spiritualmente dor di alimentá nos mes cu regularidad for dje Palabra di Dios i for dje publicacionnan dje “esclabo fiel i discreto.” (Mat. 4:4; 24:45) Ora nan a puntra Stanley Jones kico a dun’é e forsa pa soportá años encarcelá su so na China sin un Bijbel, el a bisa: “Nos por para firme den fe. Pero ta claro cu nos tin cu studia promé. Nos no tin niun forsa si nos no studia.”
4 Mediante Asistencia na Reunion: Na un reunion cristian den promé siglo, Hudas i Sílas “a animá e rumannan cu hopi discurso i a fortalecé nan.” (Echo. 15:32) Awe ta mescos. Loke nos ta tende n’e reunionnan ta profundisá nos aprecio pa Jehova, ta haci nos fe mas fuerte i ta stimulá nos pa participá den e ministerio. Mediante e reunionnan nos tin contacto regular cu “compañeronan di trabou p’e reino di Dios,” kendenan ta nos “yudansa fortalecedor.”—Col. 4:11.
5 Nos tin mester di yudansa den e ‘tempu crítico aki, duru pa trata cuné.’ (2 Tim. 3:1) Bijbel ta sigurá nos cu esnan cu haña fortalesa for di Jehova “lo subi cu ala manera águila. Nan lo core i no fatigá; nan lo cana i no cansa.”—Isa. 40:31.