Reunionnan Ta Beneficiá Hóbennan
1 Un mucha muher tiener a bisa: “Tin biaha mi ta pensa cu hóbennan tin e bida di mas pisá. Nos ta meimei di hende cu ta cometé fornicacion, ta usa droga i ta bebe.” Abo tambe ta sinti mescos? Si ta asina, kico bo ta kere lo por yuda bo lucha contra e mal influencianan aki? Bo tin mester di fe, fe firme cu Jehova su caminda ta esun corecto, pasobra sin esei “ta imposibel pa agrad’é bon.” (Heb. 11:6) Asistí na reunionnan di congregacion lo yuda bo fortalecé bo conviccionnan cristian i bo determinacion pa evitá loke ta malu.
2 Reunionnan Tin Hopi di Ofrecé Bo: Kico ta haci un bon cuminda huntu cu amigunan íntimo dushi? No ta e combinacion di cuminda saludabel i compania agradabel den un ambiente relahá? Wel, nos reunionnan ta ofrecé bo e mésun dushi experencia, pero den un sentido spiritual.
3 E cosnan cu ta ser tratá na reunion ta edificante, nan ta varia for di asuntunan cu ta trata problemanan di bida diario te na studia profecianan fasinante di Bijbel. E reunionnan ta presentá instruccion práctico cu ta siña bo con pa hiba e mihó estilo di bida i enfrentá e situacionnan difícil cu bo ta haña bo cuné. E compañeronan cu nos ta haña na reunion ta e mihónan cu tin, i e ambiente spiritual ta agradabel i sin peliger. (Sal. 133:1) Nada straño cu un hóben a bisa: “Mi ta bai scol henter dia, i esei ta caba cu mi. Pero e reunionnan ta manera un oásis den desierto, caminda mi ta ser refrescá pa por logra pasa e siguiente dia na scol.” Un otro hóben a bisa: “Mi a ripará cu asociacion cerá cu otronan cu ta stima Jehova ta yuda mi keda cerca di Jehova.”
4 Dor di inscribí bo mes den e Scol di Ministerio Teocrático, bo ta siña busca informacion bíblico, desaroy’é den un discurso i despues present’é den forma di combersacion dilanti un auditorio na Salon di Reino. Imaginá bo e beneficio di ser entrená pa siña otro hende den un manera ábil e berdadnan cu ta salba bida cu tin den e Palabra di Dios! Cua otro caminda hóbennan por haña un entrenamentu asina balioso?
5 Con pa Saca Mayor Probecho for dje Reunionnan: Pa saca mayor probecho for dje reunionnan, tres cos ta vital. Nan ta preparacion, participacion i aplicacion, esta, pone na práctica.
6 Prepará pa Nan: Apartá tempu riba un base regular pa prepará p’e reunionnan. No laga huiswerk, trabou part-time ni actividadnan di recreo horta bo tempu cu bo tin mester pa repasá di antemano e informacion cu lo ser tratá na cada reunion. Un bon rutina por yuda bo. Promé cos i mas importante, bo mester keda pareu cu e programa di lesamentu di Bijbel semanal pa e Scol di Ministerio Teocrático. Bo mester di solamente un par di minuut tur dia pa lesa i meditá riba e capítulonan asigná. Apartá tempu pa prepará p’e Studio di Buki di Congregacion i e Studio di Toren di Vigilancia. Tin ruman ta haci esaki por lo ménos un of dos dia promé cu e reunionnan ei. Te caminda ta posibel, haci mescos cu e partinan programá pa e Reunion di Sirbishi di cada siman.
7 Participá den Nan: Bijbel ta bisa cu na edad di 12 aña, nan a haña Jesus den tempel, scuchando, haciendo pregunta i dunando contesta. (Luc. 2:46, 47) Cu otro palabra, e tabata completamente enbolbí. Lo bo beneficiá mas for dje reunionnan si bo haci esfuerso pa participá den nan.—Pro. 15:23.
8 Bo tin cu concentrá activamente riba loke ta ser instruí na reunion. Tin biaha, scucha un discurso ta mas difícil cu duna un discurso. Di con? Podisé bo mente ta dual ora un otro hende ta papia. Con bo por combatí esaki? Dor di haci anotacion. Skirbi brevemente puntonan importante cu lo bo kier chek despues. Haci anotacion lo yuda bo tene bo mente enfocá riba e programa. Tambe, busca e textonan i lesa nan pareu cu e orador.
9 Ademas, pone como bo meta pa participá den tur parti na reunion cu ta consistí di pregunta i contesta. Lo bo beneficiá asta mas si bo pensa cuidadosamente riba loke bo kier bisa. Proverbionan 15:28 ta bisa: “E curason dje hustu ta meditá pa duna contesta.”
10 Practicá Loke Bo Siña: E último paso ta pa haci sigur cu loke bo siña ta ‘obra den bo.’ (1 Tes. 2:13) Segun bo ta aplicá e puntonan excelente cu bo ta siña na cada reunion, lo bo hala mas cerca di Jehova Dios. Lo e ta real pa bo, i lo bo sinti gran goso i satisfaccion segun bo ta “sigui cana den e berdad,” haciendo e berdad di bo mes.—3 Juan 4.
11 Hóbennan, ora boso ta prepará pa e reunionnan riba un base regular, participá den nan i ta pone na práctica loke boso siña, boso lo disfrutá plenamente dje reunionnan. Na mésun tempu, boso lo saca e máximo probecho for di nan. Boso fe lo bira mas fuerte, i tambe boso determinacion pa keda fiel na boso Tata celestial, Jehova.—Sal. 145:18.