Esnan di Mas Edad Ta Predicá Sin Stop
1 Hopi hende segun cu nan edad ta subi, ta spera cu anhelo pa baha cu penshon for di nan trabou seglar i cuminsá disfrutá di un bida sin preocupacion durante e añanan cu a resta. Tal bes nan ta pensa cu nan a traha suficiente duru i awor ta merecé un sosiegu. Of tal bes nan kier djis disfrutá di bida, loke sea falta ainda pa biba.—Luc. 12:19.
2 Como sirbidónan dedicá di Jehova, nos tin un punto di bista diferente pa cu bida. Nos sa cu den e sirbishi di Dios no tin bahamentu cu penshon. Nos punto di bista ta positivo pasobra nos tin “bida eterno na bista.” (Hudas 21) Conocimentu i experencia acumulá atrabes di hopi aña, por mehorá un persona su dicernimentu i perspicacia. Esaki lo por hací bo bira mas sabí i mas balansá i poné bo manifestá un aprecio mas profundo pa bida. Tur e atributonan aki ta beneficiá bo mashá como un minister dje bon nobo.
3 Bira bieu no ta solamente un asuntu di bira bieu físicamente; e ta enbolbé tambe bo actitud mental. Si bo ta spera di biba largu i bo ta haci lo posibel pa mantené un punto di bista yong, bo tin mas chens di logra tantu esun como e otro. Hende di mas edad por enrikes’é nan bida dor di aumentá nan conocimentu spiritual i compartié cu otronan.—1 Cor. 9:23.
4 Ehempelnan di Bida Real: Na edad di 86 aña, un ruman muher a bisa: “Ora mi refleccioná riba e 60 añanan cu a pasa desde cu mi a siña e berdad, e promesa trankilisante di Dios ta brota den mi curason. Sí, Jehova kende lo actua den lealtad cu esnan leal ta laga nos cosechá goso abundante.” (Sal. 18:25) Un ruman homber di edad avansá a corda con e morto di su esposa a dal e un sla duru, despues di cua su salú a bai masha hopi atras. El a bisa: “Tog, mediante Jehova su bondad inmerecí, mi a rebibá suficientemente te cu mi por a drenta e sirbishi di pionero dos aña despues. Ki gradicidu mi ta na Jehova cu mi salú de echo a mehorá cu e aumento aki den actividad di predicá!”
5 Ta ki encomendabel cu asina tantu ruman di mas edad ta dicididu pa sigui predicá te con leu cu nan salú i fortalesa ta permití—sin stop! Nan tin bon motibu pa sclama: “O Dios, bo a siñá mi desde mi hubentud padilanti, i te cu awor mi ta sigui declará bo obranan maraviyoso.”—Sal. 71:17.