Multitudnan Ta Ser Agregá
1 Manera tabata e caso den e promé siglo, e crecementu cu e congregacion cristian ta experenciando awe ta fenomenal. (Echo. 2:41; 4:4) Aña pasá, 366.579 disipel nobo a bautisá, un promedio di mas cu 1.000 pa dia! Mas cu un miyon a bautisá den e último tres añanan. En berdad, Jehova a sigui agregá multitudnan di creyente.—Echo. 5:14.
2 E hopi miembronan nobo cu ta falta experencia den e moda di biba cristian tin mester di yudansa i entrenamentu for di esnan cu ta fuerte den e fe. (Rom. 15:1) Entre e cristiannan di promé tabatin algun cu, asta añanan despues di nan bautismo, a keda sin “forsa padilanti na madures.” (Heb. 5:12; 6:1) P’e motibu ei, den su carta n’e hebreonan, Pablo a resaltá áreanan den cua cristiannan tin cu crece spiritualmente. Cua esakinan ta, i con nos por ofrecé e yudansa necesario?
3 Adkiriendo Bon Custumbernan di Studio: Na armonia cu Pablo su instruccion, ser un bon studiante ta enbolbé siña activamente, repasá e les i usa e “cuminda sólido” cu Jehova su organisacion ta percurá. (Heb. 5:13, 14; mira E Toren di Vigilancia di 15 di augustus, 1993, página 12-17.) Dor di enbolbé creyentenan nobo den combersacionnan spiritual i compartí cu nan hoyanan precioso dje berdad cu abo a descubrí mediante bo investigacion personal, lo bo por stimulá nan pa adkerí bon custumbernan di studio. Kisas de bes en cuando lo bo por invitá un creyente nobo pa djoin bo den bo studio personal of di famia.
4 Asistiendo Regularmente n’e Reunionnan: Bo ehempel fiel i palabranan amoroso di animacion lo yuda miembronan nobo dje congregacion pa evitá un otro área di preocupacion cu Pablo a mencioná—e “custumber” cu algun tin di perde reunionnan cristiannan. (Heb. 10:24, 25) Yuda nan comprendé cu e reunionnan ta nan cabuya salbabida spiritual cu e congregacion. Tuma e iniciativa pa laga nan sinti nan mes bon biní como parti di nos hermandad.
5 Acercando Jehova cu Confiansa: Pa vence debilidadnan carnal i defectonan di personalidad, nos mester acudí na Jehova den oracion, expresando na dje nos pensamentunan di mas profundo i preocupacionnan di mas íntimo. Rumannan nobo mester siña cu si nan suplicá Jehova pa yudansa, manera Pablo a insta, nan no tin nodi di tambaleá. (Heb. 4:15, 16; 10:22) Dor di relatá bo experencianan personal relacioná cu esaki lo bo fortalecé un ruman nobo su confiansa cu Jehova ta tende oracionnan sincero.
6 Programando Tempu p’e Ministerio: Tambe Pablo a mustra cu ora nos ‘semper ta ofrecé na Dios un sacrificio di alabansa,’ esei ta spiritualmente fortificante. (Heb. 13:15) Bo por invitá un publicador nobo pa djoin bo den bo areglonan semanal pa sirbishi di veld? Kisas boso dos lo por prepará boso presentacionnan of considerá un rasgo dje ministerio cu e publicador mas nobo no a purba ainda.
7 E multitudnan cu ta ser agregá ta un motibu di gran goso. Dor di dedicá nos mes na entrená i exhortá miembronan nobo dje congregacion lo yuda nan desaroyá e fe fuerte cu ta necesario pa ‘conserbá nan alma na bida.’—Heb. 3:12, 13; 10:39.