Bo Tabata Sa?
Snoa di Promé Siglo: E plachi akí ta basá riba e ruinanan di un snoa di promé siglo ku nan a haña na Gamla (Gamala), mas o ménos 10 kilometer nortost di Laman di Galilea. E ta duna nos un idea kon un snoa den tempu antiguo lo tabata
Unda snoa a originá?
E PALABRA “snoa” (òf, “sinagoga”) ta bini for di un palabra griego ku ta nifiká “asamblea” òf “reuní huntu.” E nòmber ei ta apropiá, pasobra for di tempu antiguo e komunidat hudiu tabatin kustumber di reuní na snoa pa haña instrukshon i adorá Dios. E Skritura Hebreo no ta papia di snoa direktamente. Pero ta bisto for di e Skritura Griego Kristian ku den promé siglo e tipo di lugánan ei tabata eksistí kaba.
Mayoria di eksperto ta pensa ku snoa a originá durante e tempu ku e hudiunan tabata den eksilio na Babilonia. E Encyclopaedia Judaica ta bisa: “E Eksiliadonan no tabatin Tèmpel, nan tabata den un pais estranhero i nan tabatin mester di konsuelo den nan angustia. P’esei, de bes en kuando nan tabata reuní huntu, probablemente riba sabat, i lesa e Skritura.” Parse ku ora e hudiunan a haña nan libertat for di eksilio, nan a sigui reuní huntu pa hasi orashon i lesa for di e Skritura, i nan a traha snoa unda ku nan a bai.
Den promé siglo, ya tabatin snoa den e region di Laman Mediteráneo, na Medio Oriente i na Israel mes. E snoanan a bira e sentro di aktividat religioso i sosial di e komunidatnan hudiu na e lugánan ei. Profèser Lee Levine di Universidat Hebreo di Herúsalèm a bisa: “Na snoa, e hudiunan tabata studia, kome kuminda sagrado riba sabat i dianan di fiesta, tene kaso hudisial, depositá donashon pa e komunidat i tene reunion polítiko i sosial.” El a agregá: “Klaru ku loke tabata mas importante tabata nan reunionnan religioso.” Esei ta yuda nos komprondé dikon Hesus hopi biaha tabata bishitá snoa. (Mar. 1:21; 6:2; Luk. 4:16) Einan Hesus a siña, urgi i animá e hendenan presente. Despues ku e kongregashon kristian a ser establesé, apòstel Pablo tambe tabatin e kustumber di prediká den snoa. Hende interesá den asuntu spiritual tabata bai snoa. P’esei, mayoria di biaha ora Pablo a yega na un stat, e tabata bai prediká promé na e snoa.—Echo. 17:1, 2; 18:4.