Pregunta di Lektor

Dikon Testigunan di Yehova ta usa un hòmber pelon òf ku tiki kabei pa representá apòstel Pablo?

Pa nos ta franko, awe niun hende no sa sigur kon e aparensia di Pablo tabata. E pinturanan ku ta ser usá den nos publikashonnan pa representá Pablo ta obranan artístiko i no ta imágennan basá riba evidensia arkeológiko.

Sinembargo, tin algun informashon relashoná ku e aparensia di Pablo. Por ehèmpel, e Toren di Vigilansia di Sion di 1 di mart 1902 (na ingles) a menshoná un di esakinan, bisando: “Pa loke ta trata Pablo su aparensia: . . . Den ‘Echonan di Pablo i Tekla,’ . . . skirbí rònt di aña 150 despues di Kristu, tin un deskripshon di Pablo ku kisas ta esun mihó i basá riba tradishon konfiabel. Den e obra akí, Pablo ta ser deskribí komo un hòmber ‘kòrtiku, pelon, bon formá, ku pia o, ku wènkbrou ku ta topa otro i ku nanishi largu.’”

Relashoná ku Echonan di Pablo i Tekla, The Oxford Dictionary of the Christian Church (edishon 1997) ta bisa: “Ta posibel ku ‘Echonan’ ta kontené algun detaye ku ta korekto segun historia.” Den e promé siglonan despues di Kristu, e obra Echonan di Pablo i Tekla tabata masha respetá. Prueba di esaki ta e echo ku tin 80 manuskrito di dje na griego i na otro idioma. Pues, e manera ku nos publikashonnan ta presentá Pablo ta kuadra ku algun deskripshon antiguo di e aparensia di Pablo.

Pero tene na mente, ku tin otro kos mas importante ku e aparensia di Pablo. Tempu ku Pablo tabata prediká, algun krítiko ku tabatin un punto di bista karnal a bisa: “Su presensia en persona no [ta] impreshonante, i su palabranan no tin nada aden.” (2 Kor. 10:10) Pero, nos no mester lubidá ku el a bira un kristian pasobra Hesus a aparesé na dje pa medio di un milager. Ta bon pa nos pensa tambe riba loke Pablo a logra despues ku el a ser skohé pa duna testimonio tokante Hesus su nòmber na e nashonnan.” (Echo. 9:3-5, 15; 22:6-8) Ademas, nos tin ku pensa riba tur e benefisionan ku nos por saka for di e bukinan di Beibel ku Yehova a inspirá Pablo pa skirbi.

Pablo a logra hopi kos importante promé ku el a bira kristian, pero e no a broma tokante eseinan, ni e no a menshoná kon su aparensia tabata. (Echo. 26:4, 5; Flp. 3:4-6) El a atmití: “Mi ta esun di mas insignifikante di e apòstelnan, i mi no ta digno di ser yamá apòstel.” (1 Kor. 15:9) Mas despues el a skirbi: “Na ami, esun di mas insignifikante di tur e santunan, el a mustra e bondat inmeresí akí, esta, pa mi deklará na e nashonnan e bon notisia tokante e rikesa insondabel di Kristu.” (Efe. 3:8) Sin duda, e mensahe ei sigur ta mas importante ku Pablo su aparensia.