Su Sirbishi na Dios Ta Su Remedi!

Dos pionero a keda masha sorprendí ora nan a drenta un kas na Kenia i a mira un hòmber chikitu drumí riba kama. Tantu e parti djariba di su kurpa komo su brasanan ta masha kòrtiku. Ora nos rumannan a kont’é di Dios su promesa registrá na Isaías 35:6, ku ta mustra ku un dia “e kohonan lo bula manera biná,” el a haña un sonrisa grandi riba su kara.

E pioneronan a haña sa ku Onesmus a nase ku osteogenesis imperfecta, un malesa ku ta pone hende su wesunan bira bròs. Su wesunan ta masha frágil; nan ta asina frágil ku, asta ora bo dun’é man pa kumind’é, nan por kibra. I komo ku no tin kura òf tratamentu pa su malesa, Onesmus tabata pensa ku lo e mester a pasa e restu di su bida ku doló i den ròlstul.

Onesmus a aseptá un estudio di Beibel. Pero su mama no tabata ke pa e bai reunion pasobra e tabatin miedu ku Onesmus lo lastimá su kurpa i haña mas doló. P’esei, e rumannan tabata graba e reunionnan, i Onesmus tabata skucha esakinan na kas. Despues ku Onesmus tabatin sinku luna ta studia, el a disidí ku e ta bai e reunionnan apesar di e riesgonan.

Su baimentu di reunion a kous’é mas doló? Nò, al kontrario. El a bisa: “Ta komo si fuera ku e dolónan ku mi ta sinti konstantemente ta bira ménos ora mi ta na reunion.” Onesmus ta kere ku ta e speransa nobo ku el a haña ta pon’é sintié mihó. Onesmus su mama a ripará ku Onesmus su aktitut a kambia i e tabata asina kontentu ku e tambe a kuminsá studia Beibel. E tabata bisa: “Sirbishi na Dios ta mi yu su remedi.”

No a dura muchu ku Onesmus a bira publikadó no batisá. Ku tempu, el a batisá i awor e ta sirbi komo sirbidó ministerial. Aunke Onesmus no por usa un di su brasanan ni su pianan, e tabata ke hasi tur loke e por pa sirbi Yehova. E kier a traha pionero ousiliar, pero e tabata vasilá pa apliká. Dikon? Pasobra e tabata sa ku lo e mester dependé riba otro hende pa pusha su ròlstul. Pero ora el a ekspresá su preokupashon na su rumannan den fe, nan a primintié ku nan lo sosten’é. I esei ta presis loke nan a hasi; nan a yuda Onesmus traha pionero ousiliar.

Despues, Onesmus tabata kier a kuminsá traha pionero regular, pero atrobe el a vasilá pa e mesun motibu. Ma na un dado momento, e teksto di dia a dun’é e animashon ku e tabatin mester. Tabata e teksto di Salmo 34:8, ku ta bisa: “O purba i mira ku [Yehova] ta bon.” Despues di a meditá riba e teksto, Onesmus a tuma su desishon i a bira pionero regular. Awor e ta prediká kuater dia pa siman i tin vários studiante di Beibel ku ta progresá bon den e bèrdat. Na 2010, Onesmus a asistí na e Skol di Sirbishi di Pionero. El a keda kontentu ora el a haña sa ku un di e instruktornan tabata un di e dos rumannan ku a prediká na dje na promé instante.

Awor Onesmus tin kasi 40 aña di edat; tur su dos mayornan a muri, pero e rumannan di kongregashon ta sigui perkurá pa su nesesidatnan. E ta masha gradisidu pa e bendishonnan ku e ta disfrutá di dje awe i ta anhelá pa e dia yega ku “ningun habitante lo no bisa: ‘Mi ta malu.’”—Isa. 33:24.