Spiritu—Ken Nan Ta?

Na Europa, un señora di edat ta drenta misa, i ku su rosario den man respetuosamente e ta hinka rudia dilanti un imágen di Maria. Na Afrika, un famia ta basha un tiki yenefer banda di e graf di un miembro respetá di e famia. Na e kontinente di Amérika, un yònkuman ta yuna i meditá, ku e speransa di komuniká ku esun ku e ta kere ta su angel wardadó. Na Asia, un saserdote ta kima ophetonan di papel kolorido komo ofrenda na spiritunan di antepasado.

KIKO e hendenan akí tin en komun? Nan tur ta kere ku spiritu ta eksistí, ku bo por komuniká ku nan i ku nan por tin gran influensia riba bida di hende. Klaru ku e kreensia akí no ta nada nobo ni sorprendente. Loke sí ta sorprendente ta ku tin asina tantu idea kontradiktorio tokante ken nan ta.

Mòslem ta adorá ún Dios, esta, Ala.a Hende den kristiandat ta bisa ku Dios ta un Trinidat, ku ta konsistí di Dios Tata, Dios Yu i Dios Spiritu Santu. Hindú ta kere ku ta eksistí mas ku mil dios i diosa. Otro hende ta bisa ku spiritu ta biba den sierto bestia, palu, piedra i riu. Tambe tin hende ta laga buki, pelíkula i programanan di televishon tokante angel i demoño, dios i diosa influensiá nan.

Meskos ku tin hopi idea diferente i kontradiktorio tokante diosnan, asina tambe tin hopi idea diferente i kontradiktorio tokante método pa komuniká ku nan. Ta klaru ku tur e métodonan akí no por ta korekto. Laga nos duna un ehèmpel: Promé ku nos hasi un yamada, nos mester sa ta ken nos ta bai yama i nos mester tin sigur ku e persona ei realmente ta eksistí i ku lo e atendé nos yamada. No tin niun sentido pa purba komuniká ku un persona imaginario. Pió ainda, komuniká ku un persona ku ta pretendé di ta un otro persona por ta asta peligroso.

Pues anto, ta ken realmente e spiritunan akí ta? Beibel no solamente ta kontestá e pregunta akí, sino e ta splika tambe ken nos tin ku komuniká kuné i kiko nos por spera. Si bo sigui lesa kisas lo bo keda sorprendí di loke Beibel ta bisa.

[Nota]