Sekreto 2

No Kompará Bo Mes ku Otro Hende

KIKO BEIBEL TA SIÑA? “Kada un di boso mester husga su mes aktonan i si nan keda aprobá lo e por broma ku nan. Lo e no por broma si e kompará su mes ku otro hende.”​—Galationan 6:4, BPK.

KIKO TA E PROBLEMA? Kisas nos gusta kompará nos mes ku otro hende; tin biaha ku esnan ku tin ménos ku nos, pero hopi biaha ku esnan ku ta mas fuerte, mas riku òf ku tin mas talento ku nos. Sea kual sea ta e kaso, no ta bon pa nos kompará nos mes ku otro hende, pasobra nos ta asumí ekibokadamente ku loke ta determiná balor di un persona ta loke e tin òf loke e por hasi. Ademas, nos lo por fomentá envidia i un spiritu di kompetensia.​—Eklesiastés 4:4.

KIKO BO POR HASI? Trata di mira bo mes manera Dios ta mira bo. Laga su manera di mira kosnan influensiá bo sentido di balor propio. “Hende ta wak aparensia di pafó, ma SEÑOR [Yehova, NW]a ta wak kurason.” (1 Samuel 16:7) Yehova no ta midi nos balor dor di kompará nos ku otro hende; mas bien, e ta lesa nos kurason i saminá nos pensamentu-, sintimentu- i intenshonnan. (Hebreonan 4:​12, 13) Yehova sa kiko ta nos limitashonnan i ta urgi nos pa nos tambe tene kuenta ku nan. Si bo ta midi bo balor propio dor di kompará bo mes ku otro hende, lo bo bira sea orguyoso òf lo bo ta semper mal kontentu. Pues, aseptá humildemente ku bo no por sobresalí den tur kos ku bo hasi.​—Proverbionan 11:2.

Kiko presis bo tin ku hasi pa bo tin balor den bista di Dios? El a inspirá profeta Mikeas pa skirbi: “El a bisa bo, o hende, loke ta bon; i kiko SEÑOR ta eksigí di bo, si no ta pa hasi hustisia, pa stima miserikòrdia, i pa kana humildemente ku bo Dios?” (Mikeas 6:8) Si bo sigui e konseho ei, Dios lo perkurá pa bo. (1 Pedro 5:​6, 7) Por tin un motibu mas grandi ku esei pa nos ta satisfecho den bida?

[Nota]

[Plachi na página 5]

Yehova ta midi nos balor a base di loke tin den nos kurason