‘Djis Ún So Mas’

ALLEN a kuminsá bebe di mas ora e tabatin 11 aña.a Ora Allen ku su amigunan tabata hunga den mondi, nan tabata imitá e artistanan ku nan tabata mira den pelíkula. E personahenan ku nan tabata imitá tabata fiktisio, pero e bibida ku Allen i su amigunan tabata bebe sí tabata real.

Tony tabatin 40 aña ora ku gradualmente el a oumentá e kantidat di drinks ku e tabata bebe den un anochi for di ún òf dos te ku sinku òf seis. Ku tempu el a pèrdè konteo di e kantidat di drinks ku e tabata bebe durante un dia.

Allen a buska yudansa pa su problema ku alkohòl. Tony a rechasá e yudansa ku su famia i amigunan amoroso a ofres’é. Allen ta na bida awe pa konta su historia; Tony a fayesé un par di aña pasá den un aksidente di outo despues ku el a bebe di mas.

Asta ora un hende ta bebe di mas su so, inevitablemente su bebementu ta afektá bida di otro hende, i hopi bes ku konsekuensia trágiko.b Algun di e konsekuensianan di abusu di alkohòl ta maltrato físiko i verbal, atrako i asesinato, aksidente di outo, aksidente na trabou i tambe un kantidat di problema ku salú. Bebementu di mas ta kosta sosiedat míles di miónes di florin pa aña, sin menshoná e daño personal i emoshonal ku esaki ta kousa na hende individual, famianan i yunan.

Tòg, e Instituto Nashonal di Salubridat di Merka ta bisa ku “no ta tur hende ku ta bebe regularmente tin problema ku bebementu i no ta tur hende ku tin problema ku bebementu ta bebe tur dia.” Hopi hende ku no ta alkoholista a bin desaroyá e kustumber di bebe di mas sin ripará. Otronan ta bebe de bes en kuando pero ta bebe mas ku sinku drinks na un solo okashon.

Si bo skohe pa bebe alkohòl, kuantu ta di mas? Kon bo por sa ki ora bo no mester bebe “djis ún drinks so mas”? (Proverbionan 23:​29, 30, Contemporary English Version) E siguiente artíkulonan lo trata informashon útil tokante e tópiko akí.

[Nota]