Bo Tabata Sa?

Ki sorto di trabou Hesus a hasi komo karpinté?

Hesus su tata di kriansa tabata un karpinté. Hesus tambe a siña e fishi di karpinté. Ora el a kuminsá su ministerio na edat di “mas o ménos trinta aña,” hende tabata konos’é no solamente komo “yu di e karpinté” sino tambe komo un persona ku tin e fishi di karpinté.—Lukas 3:23; Mateo 13:55; Marko 6:3.

Den e stat kaminda Hesus a nase, probablemente hende tabatin mester di hèrmènt pa traha den kunuku, manera plug i yugo, ku tabata trahá prinsipalmente di palu. Otro kosnan ku un karpinté lo a traha ku regularidat tabata muebelnan manera mesa, stul, krùk i baul pa warda kos; tambe nan tabata traha porta, bentana, slòt di palu i span di dak. De echo, un parti di e trabou di un karpinté tabata enserá konstrukshon.

Den un ilustrashon, Juan Boutista a menshoná hacha, un hèrmènt ku Hesus i otro karpinténan probablemente a usa pa kap palu. Despues, nan tabata sea kòrta e palu einan mes òf nan tabata hiba e palu ku nan a kaba di kap na nan tayer. Sin duda, nan mester tabatin hopi forsa pa hasi e tipo di trabounan akí. (Mateo 3:10) Isaias ta menshoná otro hèrmèntnan ku un karpinté den su tempu tabata usa: “E karpinté ta span su liña-di-midi; e ta marka e palu ku kreit. E ta traha riba dje ku skaf, ta mark’é ku paser.” (Isaias 44:13) Deskubrimentunan arkeológiko ta mustra bon kla ku hende den tempu bíbliko tabata usa zag di metal, martin di piedra i klabu di bròns. (Eksodo 21:6; Isaias 10:15; Jeremias 10:4) Pues ta rasonabel pa konkluí ku Hesus a usa e hèrmèntnan ei.

Ora Hesus a menshoná “banko [òf “bankero,” NW]” den un di su ilustrashonnan, na ken el a referí i ki trabou nan tabata hasi?

Hesus a papia di un shon ku a reprendé un esklabo improduktivo, bisando: “Bo mester a pone mi plaka na banko, pa ora mi bin, mi risibí loke ta di mi ku interes.”—Mateo 25:27.

Bankonan grandi ku nos konosé awendia no tabata eksistí den Hesus su tempu. Sinembargo, hopi tempu promé ku Hesus a bini na tera, ya tabata komun pa fiadónan di plaka paga interes na hende ku a bin depositá plaka serka nan i pa kobra hende ku a fia plaka for di nan interesnan mas haltu. Segun The Anchor Bible Dictionary, den siglo 4 promé ku nos era tabata komun na Gresia pa hende paga interes riba plaka ku nan a fia. I durante e periodo di pas ku e romanonan a establesé, e porsentahe di interes anual pa krédito den e Imperio Romano tabata fluktua entre 4 i 6 porshento.

E Lei di Moisés a prohibí pa kobra interes riba plaka ku e israelitanan den nesesidat a fia. (Eksodo 22:25) Ta parse ku e regla akí tabata konta prinsipalmente pa hende pober. Sinembargo, manera Hesus su komparashon a indiká, tabata normal pa haña interes pa fondonan depositá serka fiadó di plaka òf “bankero.” Pues, manera semper, Hesus a usa kosnan ku tabata konosí pa su oyentenan.