Adryana Su Deseo

ADRYANA, un mucha muhé di seis aña na Tulsa (Oklahoma, Merka), tabatin un deseo. Su deseo tabata kasi meskos ku di e salmista David, kende a kanta: ‘Un kos mi a deseá di Yehova, esei lo mi buska: ku mi por keda den e kas di Yehova tur e dianan di mi bida, pa kontemplá e bunitesa di Yehova, i pa meditá den su tèmpel.’—Salmo 27:4.

Ora Adryana tabatin apénas seis luna di edat, dòkternan a konstatá ku e tin neuroblastoma, un tumor maligno ku ta krese den sierto parti di e sistema nèrvioso. E enfermedat mortal aki a lag’é paralisá na ámbos pia. Dòkternan a trata su malesa ku un kantidat di operashon i el a haña kimoterapia pa ún aña largu.

E tata di Adryana, kende no tin e mesun konvikshon religioso ku Adryana i su mama, a tuma kontakto ku un fundashon pa pidi nan duna un man pa su yu muhé por bishitá un parke di rekreo mundialmente famoso. Promé ku e fundashon a kumpli ku e deseo, nan a entrevistá Adryana. El a gradisí nan p’e echo ku nan lo kier a hasi algu p’e, pero el a bisa nan ku lo el a preferá di bishitá Bètel, e sentro di aktividat mundial di Testigunan di Yehova na New York. Despues ku Adryana a haña sa tokante e petishon di su tata, el a pidi Yehova den orashon pa dun’é un chèns di bishitá Bètel. Ounke e fundashon na promé instante tabata un tiki preokupá ku Bètel kisas lo no ta un lugá interesante pa un mucha, nan a kumpli ku Adryana su deseo ora ku su tata a indiká ku e no tabatin problema ku loke Adryana a skohe.

Kompañá pa su mama, su ruman muhé i un amiga, Adryana a biaha bai New York pa bishita Bètel pa promé bes. El a bisa: “Yehova a kontestá mi. Mi tabata sa ku lo el a duna nos un bonbiní na Bètel. Mi a mira kon nan ta traha e bukinan, e revistanan i e Beibelnan. Esaki ta mihó ku un parke di rekreo.”

Adryana a ‘kontemplá e bunitesa di Yehova’ i a meditá ku apresio riba e funshonamentu di e sentro di aktividat di e pueblo di Yehova djawe. Bo tambe ta bonbiní pa bishitá Bètel. Fuera di e sede mundial di Testigunan di Yehova na New York, tin sukursal na vários parti di mundu.