Pregunta di Lektor
Kon nos tin ku komprondé Pablo su palabranan ora el a bisa ku un biuda mester ta “esposa di un homber so” pa e por bini na remarke pa haña yudansa for di e kongregashon kristian?—1 Timoteo 5:9.
Siendo ku apòstel Pablo tabata papiando di un biuda, e ekspreshon “esposa di un hòmber so” opviamente mester ta refiriendo na su situashon promé ku el a bira biuda. Akaso esaki ta nifiká ku e biuda mester tabata kasá un biaha so? Òf e palabranan di Pablo lo por ke men algu diferente?a
Tin hende ta suponé ku Pablo tabata papiando di biudanan ku a yega di kasa un biaha so. Ta bèrdat ku hopi kultura i komunidat ta mira un biuda ku no a bolbe kasa komo un persona hopi rekto. Sin embargo, e punto di bista ei no ta kuadra ku loke Pablo a skirbi den otro karta. Por ehèmpel, el a splika e kristiannan korintio ku ounke e mes a haña ku un biuda lo ta mas felis si e keda soltero, “e ta liber pa kasa ku ken ku e ta deseá, basta ta den Señor.” (1 Korintionan 7:39, 40; Romanonan 7:2, 3) Ademas, Pablo a bisa den su karta na Timoteo: “Mi kier pa e biudanan mas hóben kasa.” (1 Timoteo 5:14) Pues, no tabata algu bergonsoso pa un biuda ku a deseá esei bolbe kasa.
Kon anto nos tin ku komprondé loke Pablo a skirbi Timoteo? E ekspreshon “esposa di un hòmber so” ta aparesé solamente den e versíkulo aki. Den e idioma original, e ta nifiká literalmente “muhé di ún hòmber so.” Ta interesante pa nota ku e ekspreshon aki ta meskos ku esun ku Pablo a usa vários biaha den su kartanan, esta, “esposo di ún esposa so,” òf “esposo di ún esposa,” den e idioma original. (1 Timoteo 3:2, 12; Tito 1:6) Pablo a usa e último ekspreshon aki ora el a menshoná e kualifikashonnan pa superintendente kristian i sirbidó ministerial. Den e konteksto ei, e deklarashon ta nifiká básikamente ku pa un hòmber kualifiká pa responsabilidat den e kongregashon kristian, si e ta kasá, e mester ta fiel i leal na su esposa, i e mester ta moralmente ireprochabel.b P’esei, aparentemente e ekspreshon na 1 Timoteo 5:9 lo tin e mesun nifikashon: Pa un biuda a bin na remarke pa haña yudansa for di e kongregashon, e mester tabata un esposa dediká i leal ku tabata fiel na su esposo tempu esaki tabata na bida. Tambe e mester tabata moralmente ireprochabel. Tur e rekisitonan adishonal ku Pablo a menshoná ta señalá eksaktamente na un persona asina.—1 Timoteo 5:10.
[Nota]
a Den e mundu griego-romano di e tempu dje apòstel no tabata permití e práktika di poliandria, esta, ku un hende muhé por tabatin mas ku un esposo pareu. P’esei, no ta probabel ku Pablo tabata skirbiendo Timoteo tokante e práktika aki òf sensurando un hende ku tabata praktik’é.
b Pa un konsiderashon di e punto aki, wak E Toren di Vigilansia di 15 di òktober 1996, página 17, i e “Pregunta di Lektor” den La Atalaya di 15 di febrüari 1981, página 29.