Daniel i Su Badge di Kongreso

HESUS a skual e lidernan religioso ku tabata hustu den nan mes bista pasobra nan a rabia ora nan a mira algun mucha alabá Dios públikamente. Hesus, ku rason, a puntra nan: “Boso no a lesa nunka: ‘For di boka di mucha chikitu i di yunan na pechu bo a prepará alabansa pa bo mes’?”—Mateo 21:15, 16.

Daniel, un mucha hòmber di seis aña ku ta asosiá ku un kongregashon ruso na Alemania, ta un prueba ku mucha chikitu ketu bai ta alabando Yehova. Huntu ku su mama i su ruman muhé, el a asistí na un kongreso di Testigunan di Yehova na Duisburg. Tabata promé biaha ku nan a asistí na un kongreso asina grandi. Tur kos tabata nobo pa nan: e hotèl, e ouditorio grandi, sinta ketu tres dia largu, boutismo, pa no papia mes di e drama. I kon Daniel komportá su mes? Masha bon mes.

Djaluna despues di kongreso, Daniel tabata na kas atrobe, i el a lanta mainta trempan pa bai skol. Pero kiko tabatin na su yas ainda? E badge ku a identifik’é komo un delegado di kongreso! Su mama a splik’é: “Kongreso a pasa. Awe bo por kita e badge.” Pero Daniel di: “Mi ke pa tur hende wak unda m’a bai i sa kiko m’a siña.” Pues, henter dia na skol el a kana rònt orguyoso di dje ku su badge bistí. Ora ku su yùfrou a puntr’é tokante e badge, el a konta yùfrou tokante e programa di kongreso.

Hasiendo esei, Daniel a sigui e ehèmpel di míles di mucha hòmber i mucha muhé ku atraves di siglonan a duna alabansa na Yehova públikamente.