Su Delisia Tabata den e Lei di Yehova

ALBERT D. SCHROEDER, miembro di e Kuerpo Gobernante di Testigunan di Yehova, a terminá su bida riba tera riba djarason, 8 di mart 2006. E tabatin 94 aña di edat i a dediká mas ku 73 aña den e sirbishi di tempu kompletu.

Ruman Schroeder a nase na Saginaw, Michigan, Merka, na 1911.a Komo mucha, el a siña hopi kos di Beibel for di su wela part’i mama, kende a inkulká den dje tambe un amor pa lesa e Palabra di Yehova. El a studia latin, aleman i ‘electrotechniek’ na Universidat di Michigan. Sin embargo, segun ku su apresio pa e Skritura a krese, el a laga su estudio universitario para pa drenta den e trabou di prediká e Reino tempu kompletu. Na 1932 el a bira miembro di e famia di Bètel na Brooklyn, New York.

Na 1937, tempu ku Ruman Schroeder tabatin 26 aña di edat, el a ser nombrá pa supervisá e obra di Testigunan di Yehova na Gran Bretaña. Su selo pa e trabou di prediká a animá hopi ruman einan pa drenta den sirbishi di tempu kompletu. Un di e yònkumannan ku e tabatin hopi kontakto kuné na e Bètel di Lònden tabata John E. Barr. Despues nan a sirbi huntu pa hopi aña den e Kuerpo Gobernante.

Durante e añanan di guera, outoridatnan a tuma nota di Ruman Schroeder su labornan na fabor di Testigunan di Yehova. Na ougùstùs 1942 el a ser deportá for di Gran Bretaña. Despues di a krusa Oséano Atlántiko durante un biahe angustioso den tempu di guera, el a yega Brooklyn bèk na sèptèmber.

E tempu ei, Yehova su sirbidónan tabata antisipando kaba ku un gran trabou lo mester a tuma lugá despues di Segundo Guera Mundial. Ruman Schroeder a keda gratamente sorprendí ora el a risibí su siguiente asignashon: yuda desaroyá e programa di estudio pa e Skol Bíbliko di Galaad di Watchtower. Pa algun aña el a sirbi einan komo instruktor, i a yuda entrená misionero. Studiantenan ku a haña lès serka dje na Galaad i despues den e Skol di Ministerio di Reino tin grato rekuerdo di su lèsnan. E tabatin delisia den inkulká amor pa e leinan di Dios den su studiantenan i semper el a enfatisá e importansia di konosé Yehova.

Na 1956, Ruman Schroeder a kasa ku Charlotte Bowin, i na 1958 nan yu, Judah Ben, a nase. Ruman Schroeder tabata un bon esposo i tata kristian. Na 1974 el a kuminsá sirbi den e Kuerpo Gobernante, kaminda su perspikasia a ser apresiá masha tantu. E tabata un hòmber bondadoso i humilde kende, riba tur kos, kier a engrandesé e nòmber presioso di Dios. Nos tin tur konfiansa ku Ruman Schroeder a risibí su rekompensa selestial komo un kristian ungí kende en bèrdat ‘tabatin delisia den e lei di Yehova.’—Salmo 1:2.

[Nota]