Nan Ta Kompartí Bon Notisia ku Hende Surdu

“NAN ta trese norma- i balornan spiritual pa bo!” Asina direktor di un kas pa ansiano na Navalcarnero (Madrid, Spaña) a deskribí resientemente e bishitanan di Testigunan di Yehova na su sentro. Kiko a motiv’é pa bisa esei?

Vários habitante di e sentro Rosas del Camino ta surdu. Sin embargo, komo ku e Testigunan a hasi e esfuerso pa siña idioma di seña spañó, nan por komuniká ku e habitantenan aki. E direktor a elogiá e Testigunan pasobra gratuitamente nan ta ofresé nan tempu pa siña norma- i balornan spiritual na personanan ku nesesidat spesial. El a opservá e bon efekto ku siñamentu di e bon notisia di Reino tabatin riba e habitantenan. Anto e habitantenan—spesialmente esnan ku desabilidat di oido òf di bista—tambe ta apresiá e bishitanan di e Testigunan masha hopi.

Eulogio, un di e habitantenan ku ta siegu i surdu, ta studiando Beibel ku e Testigunan di Yehova. Un dia ku nan tabata bezig ta studia, un hòmber di edat a yega serka i a ofresé e Testigu un poesia ku e habitantenan a komponé komo muestra di nan gratitut. E poesia tabata titulá “Pa Ser un Testigu.” En parti el a bisa: “Nan ta hiba un bida rekto i disipliná, i di Yehova nan ta haña sabiduria gososo. Nan ta bai i bin na e kasnan pasobra nan ta konfia den Yehova.”

Ta nèt e konfiansa aki den Yehova a pone hopi Testigu rònt mundu siña e idioma di seña ku hende surdu den nan pais ta usa. Di e manera aki nan por kompartí ku e surdunan ei e mensahe alentador di speransa ku tin den Beibel.