“Nan No A Komprometé Nan Fe”

“BENDISHONÁ boso ta ora ku hende insultá boso i persiguí boso, i ta gaña tur klase di maldat riba boso pa mi kousa,” Hesukristu a bisa su disipelnan. (Mateo 5:11) Testigunan di Yehova djawe ta felis pasobra, na armonia ku Kristu su siñansa i ehèmpel, nan ta sòru pa ‘no ta parti di mundu,’ nan ta keda estriktamente neutral den asuntunan polítiko i ta mantené integridat na Dios bou di tur klase di sirkunstansia.—Juan 17:14; Mateo 4:8-10.

Relashoná ku e posishon firme ku Testigunan di Yehova a tuma na eks-Union Soviétiko, ku a inkluí e Testigunan na Estonia, Toomas Paul, un teólogo luterano i traduktor di Beibel, a skirbi den su buki Kirik keset küla (E Kèrki Meimei di e Pueblito): “Masha poko hende a yega di tende loke a pasa den e oranan trempan di mainta di 1 di aprel 1951. [Outoridatnan] a plania un kampaña pa deshasí di Testigunan di Yehova i di tur hende ku tabata asosiá ku nan; en total nan a kapturá i deportá 279 persona pa Siberia . . . A duna nan un chèns di firma un formulario den kua nan ta renunsiá nan fe i asina evitá deportashon òf enkarselashon. . . . Huntu ku esnan arestá anteriormente, tabatin 353 persona ku a keda interná, inkluso por lo ménos 171 persona ku tabata djis asosiá ku nan kongregashonnan. Nan no a komprometé nan fe, ni sikiera na Siberia. . . . No tabatin hopi miembro di Iglesia [Luterano di Estonia] ku un fe manera di Testigunan di Yehova.”

Testigunan di Yehova rònt mundu tin e konfiansa ku Dios ta yuda nan keda fiel i obediente na dje apesar di persekushon. Nan ta kontentu pasobra nan sa ku e rekompensa pa nan fieldat ta grandi.—Mateo 5:12.