Pregunta di Lektor
Dikon Pablo a skirbi relashoná ku un esposa kristian: “Lo e ser wardá den siguridat mediante hañamentu di yu”?—1 Timoteo 2:15, NW.
Segun e konteksto, kiko Pablo tabata ke men? Bou di inspirashon di spiritu santu e tabata duna konseho tokante e papel di hende muhé kristian den e kongregashon. El a skirbi: “Mi kier pa hende muhé dòrna nan mes ku bistí apropiá, desente i moderá, no ku kabei tur na flègtu i oro òf pèrla òf bistí kostoso, sino mas bien ku bon obra, manera ta pas pa muhénan ku ta teme Dios.” (1 Timoteo 2:9, 10) Pablo tabata urgi su ruman muhénan kristian pa nan ta modesto òf desente, balansá ora di skohe adorno personal, i pa nan ta ‘dòrná’ ku bon obra.
Kaba, Pablo a splika ken ta kabes di e muhé den e areglo di kongregashon. El a bisa: “Mi no ta permití hende muhé siña hende hòmber ni ehersé outoridat riba hende hòmber, ma pa keda ketu.” (1 Timoteo 2:12; 1 Korintionan 11:3) El a splika e base pa e areglo aki dor di mustra ku ounke Satanas no a gaña Adam, Eva sí “a ser kompletamente gañá i a yega di ta den transgreshon.” Kon un muhé kristian por evitá di kometé e mesun eror ku Eva a kometé? Pablo ta kontestá: “Sin embargo, lo e ser wardá den siguridat mediante hañamentu di yu, kon tal ku nan ta sigui den fe i amor i santifikashon huntu ku sano huisio.” (1 Timoteo 2:14, 15, NW) Kiko Pablo tabata ke men ku e palabranan aki?
Algun traduktor ta laga parse ku un hende muhé mester haña yu p’e haña salbashon. Por ehèmpel, Beibel na papiamentu koriente ta bisa: “Hende muhé lo keda salbá pa medio di hañamentu di yu.” Sin embargo, e interpretashon aki di e palabranan di Pablo no ta korekto. Hopi teksto di Beibel ta mustra ku pa un persona ser salbá e tin ku konosé Yehova, kere den Hesus, ehersé fe i demostrá e fe ei mediante obra. (Juan 17:3; Echonan 16:30, 31; Romanonan 10:10; Santiago 2:26) Ademas, Pablo no tabata ke men ku tur hende muhé kreyente lo ta garantisá di un parto safe. Tabatin hende muhé ku a haña yu sin problema, sea ku nan tabata kreyente òf nò. I lamentablemente tabatin algun hende muhé kreyente i tambe no-kreyente ku a muri durante parto.—Génesis 35:16-18.
Otro konsehonan ku Pablo a duna relashoná ku hende muhé mas despues den e mesun karta aki ta yuda nos komprondé kiko e tabata ke men. El a spièrta tokante sierto biudanan mas yòn ku ‘no solamente tabata kana pòrnada, ma tambe tabata siña hasi redu i mete den asuntu di otro hende, papiando kosnan ku no a kumbiní.’ Kiko Pablo a konsehá? El a sigui: “P’esei, mi kier pa e biudanan mas hóben kasa, haña yu, perkurá pa nan kas, i no duna e enemigu okashon pa papia malu di nan.”—1 Timoteo 5:13, 14.
Pablo a resaltá e papel positivo di hende muhé den e areglo di famia. Dor di okupá su mes ku aktividatnan manera ‘haña yu i perkurá pa su kas,’ un hende muhé ku a sigui “den fe i amor i santifikashon huntu ku sano huisio” lo no tabata inkliná na kondukta ku no ta edifikante. Su spiritualidat lo tabata konserbá, òf “wardá den siguridat.” (1 Timoteo 2:15, NW) E aktividatnan aki lo a yuda hopi hende muhé hóben evitá e trampanan di Satanas.
Loke Pablo a bisa Timoteo ta rekordá nos tur, hòmber i muhé, pa nos usa nos tempu na un manera benefisioso. E Palabra di Dios ta konsehá tur kristian: “P’esei, mira bon kon boso ta kana, no manera hende bobo, ma manera hende sabí.”—Efesionan 5:15.