Un Evento pa Rekordá

KUA evento esei ta? Esei ta morto di un hòmber ku a muri kasi 2.000 aña pasá. El a bisa: “Mi ta duna mi bida pa mi bolbe tum’é. Ni un hende no ta kit’é for di mi, ma di mi mes mi ta entreg’é.” (Juan 10:17, 18) E hòmber ei tabata Hesukristu.

Hesus a instruí su siguidónan pa konmemorá su morto sakrifisial. E okashon aki ta ser yamá tambe “e Sena di Señor.” (1 Korintionan 11:20) Testigunan di Yehova i nan amigunan lo selebrá e Memorial ku Hesus a instituí pa konmemorá su morto riba djaweps 24 di mart 2005, despues ku solo baha.

Un diskurso basá riba Beibel lo splika e nifikashon di e pan sin zürdeg i e biña kòrá ku ta ser usá pa e okashon aki. (Mateo 26:26-28) Ademas, e diskurso lo kontestá preguntanan manera: Kada kuantu tempu kristiannan mester konmemorá e evento aki? Ken por tuma for di e emblemanan, esta, e pan i e biña? Ken ta benefisiá for di Hesus su morto? E selebrashon importante aki lo yuda tur hende komprondé e propósito di Hesus su bida i morto.

Lo bo risibí un kaluroso bonbiní n’e Konmemorashon di Hesus su morto. Por fabor, chèk ku Testigunan di Yehova den bo bisindario pa bo haña sa e ora i lugá eksakto kaminda e reunion aki lo tuma lugá.