Bon Kondukta Ta “Dòrna e Doktrina di Dios”

MARIA, un hobensita di Kransnoyarsk, Rusia, ta kanta asina bon ku su maestra a hink’é den e kor di skol. Djis despues di esei, ku masha rèspèt Maria a aserká un di su maestranan i a splik’é ku e no por kanta sierto kantikanan. Dikon nò? Pasobra kanta kantikanan ku konotashon religioso ta na konflikto ku su konvikshonnan basá riba Beibel. Sorprendí, e maestra a puntra: ‘Pero kiko di malu por tin den glorifiká Dios ku un kantika?’

Pa Maria mustr’é dikon lo e nenga di kanta un kantika tokante un Dios ku ta konsistí di tres divino persona, Maria a habri su Beibel i a splik’é ku Dios i Hesukristu no ta un solo Dios i ku e spiritu santu ta Dios su forsa aktivo. (Mateo 26:39; Juan 14:28; Echonan 4:31) Maria a konta: “Esaki no a afektá mi relashon ku e maestra. Por lo general nos tin masha bon maestro na nos skol. Nan ke pa nos ta nos mes.”

Atraves di e aña eskolar, e posishon ku Maria a tuma a pone ku el a gana rèspèt di tantu e maestronan komo di e hóbennan den su klas. Maria a bisa: “Prinsipionan di Beibel ta yuda mi den mi bida. Na fin di e aña eskolar, mi a risibí un premio pa onestidat i pasobra mi kosnan semper ta na òrdu. Anto mi mayornan a risibí un karta ofisial di gradisimentu pasobra nan a duna nan yu muhé un bon edukashon.”

Maria a batisá dia 18 di ougùstùs 2001. El a bisa: “Mi ta kontentu ku mi por sirbi un Dios asina maravioso manera Yehova!” Rònt mundu hóbennan Testigu di Yehova ta kumpli ku e palabranan di Tito 2:10, ku ta bisa: “Dòrna e doktrina di Dios nos Salbadó den tur kos.”

[Plachi na página 32]

Karta di apresio i sertifikado di mérito

[Plachi na página 32]

Maria ku su mayornan despues di su boutismo