Kiko Bo Tin Ku Lesa?—E Konseho Sabí di Salomon

“SKIRBIMENTU di hopi buki ta un kos sin fin, i deboshon di mas na buki ta kansamentu di kurpa.” (Eklesiastés 12:12) Dia Salomon, e rei sabí di Israel, a skirbi e palabranan ei rònt di 3.000 aña pasá, su intenshon no tabata pa desanimá hende pa lesa. Mas bien, el a mustra riba e nesesidat pa ta selektivo. Awe, den un era den kua tur aña ta sali miónes i miónes di página imprimí rònt mundu ku material pa lesa, e rekordatorio ei ta hopi oportuno!

Evidentemente, e ‘hopi bukinan’ na kua Salomon a referí no tabata edifikante ni refreskante. P’esei, el a rasoná ku un hende ku ta dediká su mes na nan ta ‘kansa su kurpa’ sin haña nada positivo i duradero a kambio.

Pero akaso Salomon tabata ke men ku no tin niun buki ku ta duna konseho sano i konfiabel ku por benefisiá e lektor? Nò, no ta esei e kier a bisa, pasobra el a skirbi tambe: “E palabranan di hende sabí ta manera punta di heru, i maestronan di e kolekshonnan aki ta manera klabunan bon klabá; nan ta duná dor di ún Wardadó.” (Eklesiastés 12:11) Sí, tin palabranan skirbí ku ta “manera punta di heru” ku por duna bo un bon motivashon. Nan por stimulá bo pa sigui e kaminda korekto. Ademas, meskos ku “klabunan bon klabá,” nan por yuda fortalesé bo determinashon i kontribuí na bo stabilidat.

Unda bo por haña e tipo di palabranan sabí ei? Segun Salomon, e palabranan di mas sobresaliente ta esnan ku a originá ku e Wardadó, Yehova. (Salmo 23:1) P’esei e mihó buki ku bo por lesa ta Beibel, e buki inspirá pa Dios. Ora bo lesa e palabranan inspirá ei regularmente, nan por yuda bo bira “perfekto [“kompetente,” NW], ekipá pa tur bon obra.”—2 Timoteo 3:16, 17.