Bo Ta Anhelá un Mundu sin Miedu?

“Nos ta bibando den un ‘estado konstante di máksimo alerta i . . . impotensia,’ kousá pa un ‘peliger no muchu kla definí . . . ku por dal aden un ora pa otro i den kualke forma sin previo aviso.’”

E PALABRANAN aki, sitá aña pasá den e revista Newsweek, ta reflehá e sintimentunan di hopi hende ku ta biba den e mundu turbulento djawe. Hesukristu a indiká ku e sintimentunan ei lo bira mas intenso den futuro serkano. El a profetisá di un tempu ku lo tin un angustia asina grandi entre e nashonnan ku nan lo no sa e salida i ku hende lo desmayá di miedu i di e ekspektativa di loke ta tuma lugá riba tera. Pero nos lo no tin nodi tene miedu ni sinti nos impotente pasobra Hesus a agregá: “Ora ku e kosnan aki kuminsá tuma lugá, wak ariba i lanta boso kabes, pasobra boso redenshon [liberashon] ta yegando serka.”—Lukas 21:25-28.

Yehova Dios a deskribí e kondishon di bida di su pueblo riba tera despues di e liberashon ei, ku e siguiente palabranan: “Mi pueblo lo biba den un lugá kaminda pas ta reina, i den kasnan sigur i den lugánan kaminda tin sosiegu i trankilidat.” (Isaias 32:18) I pa medio di su profeta Mikeas, Yehova a bisa: “Kada un di nan lo sinta bou di su palu di wendrùif i bou di su palu di figu, i ningun hende lo no spanta nan.”—Mikeas 4:4.

Esta un kontraste ku e bida djawe! Ningun peliger deskonosí lo menasá humanidat. En bes di ta konstantemente den un estado di alerta i impotensia, lo reina kondishonnan di pas i felisidat eterno.