“Buska pa Haña Sa Ta Ken Ta Digno”

DAMASKO tabata un stat próspero den e promé siglo di nos era. Dor ku e tabata rondoná pa hòfi, e tabata manera un oásis pa karavananan ku tabata bin for di e teranan ku ta keda ost di Damasko. No muchu tempu despues di e morto di Hesukristu, tabatin un kongregashon kristian einan. Entre su miembronan tabatin hudiunan ku kisas a bira siguidó di Hesus na aña 33 di nos era, durante e Fiesta di Pentekòste na Yerusalèm. (Echonan 2:5, 41) Kisas algun disipel for di Judea a muda bai Damasko tempu ku a surgi persekushon despues di e piedramentu di Esteban.—Echonan 8:1.

Probablemente na aña 34 di nos era, un kristian di Damasko ku yama Ananias a risibí un asignashon ku no tabata usual. Señor a bis’é: “Lanta bai den e kaya ku yama Stret, i puntra na kas di Hudas pa un hòmber for di Tarso, ku yama Saulo, pasobra mira, e ta hasiendo orashon.”—Echonan 9:11.

E kaya ku yama Stret tabata rònt di un kilometer i mei largu i tabata pasa dor di e sentro di Damasko. E plachi di siglo 19 ku tin na banda drechi ta duna nos un idea kon e kaya aki tabata den antigwedat. Podisé Ananias lo a pasa un bon ratu ta buska e kas di Hudas, debí na e manera ku e kaya tabata trahá. Sin embargo, Ananias a logra hañ’é, i e resultado di su bishita tabata ku Saulo a bira apòstel Pablo, un proklamadó seloso di e bon nobo.—Echonan 9:12-19.

Hesus a manda su disipelnan pa prediká i a bisa nan pa “buska pa haña sa ta ken ta digno” di e bon nobo. (Mateo 10:11) Aparentemente, Ananias a buska Saulo literalmente. Meskos ku Ananias, ku goso Testigunan di Yehova ta buska hende digno i ta keda masha kontentu ora e hendenan aseptá e bon nobo di e Reino. Ora nan logra haña e hendenan aki, nan ta sinti ku e esfuerso ku nan a hasi ta bale la pena.—1 Korintionan 15:58.

[Plachi na página 32]

E kaya ku ántes tabata “yama Stret”

[Rekonosementu pa Potrèt na página 32]

Di e buki La Tierra Santa, Volúmen II, 1830