“Esei Ta e Mihó Kos Ku Bo Por Hasi”

ALEXIS ta un mucha hòmber di 5 aña ku ta biba na e stat Morelia, Mexico. Su mayornan ta studia Beibel i ta asistí na e reunionnan di Testigunan di Yehova. Na un asamblea ku el a bai ku su mayornan, el a mira un demostrashon tokante e trabou di prediká di kas pa kas. Spontáneamente el a bira wak su tata i a puntr’é: “Papi, Papi, dikon Papi no ta bai prediká?” E tata a kontest’é: “Ainda mi ta studiando Beibel, pa prepará pa bai hasié.” Kontentu Alexis a bis’é: “Papi, esei ta e mihó kos ku bo por hasi.”

E chikitin aki a mira e nesesidat di aktua na armonia ku su konosementu di Yehova. Ya ku algun di su primunan chikí ta biba den e mesun kas kuné, el a hasi orashon promé na Yehova i despues el a papia ku nan tokante e kosnan ku su mayornan a siñ’é for di Mi buki di relato bíblico. Ounke Alexis no por a lesa ainda, e tabata sa e kontenido di e buki hopi bon dor di e plachinan ku ta ilustrá e relatonan. Asta el a bisa ku e ke bai kas di hende pa konta nan loke e tabata siñando tokante Dios su propósito.

Sí, tantu hóben komo bieu por pone nan bida na armonia ku loke Yehova, “Esun Santu,” ta spera di nan i asina haña e privilegio úniko di duna testimonio di Yehova entre e nashonnan. (Isaias 43:3; Mateo 21:16) No tin duda ku esei ta un di e mihó kosnan ku un persona por hasi.