Pronto un Mundu sin Krímen

DJIS purba imaginá bo un mundu den kua no tin kriminal! Polis, prizon ni un sistema hudisial kompliká i kostoso lo no ta nesesario mas. Tur hende lo tin rèspèt pa bida i propiedat di otro hende. Esei ta parse imposibel? Kisas bo ta pensa asina, pero e kambionan asombroso aki ta eksaktamente loke Beibel ta primintí. Ban wak kiko e Skritura ta predisí tokante krímen i otro kosnan malu ku ta sosodé riba e tera aki.

Den e buki di Salmo, nos ta lesa: “No kunsumí pa motibu di malbadonan, ni sea envidioso di e hasidónan di inikidat. Pasobra pronto nan lo wòrdu kòrtá manera yerba, i nan lo marchitá manera yerba bèrdè. Ma e humildenan lo heredá e tera, i lo deleitá nan mes den pas abundante.” (Salmo 37:1, 2, 11) En realidat, ningun hende no por stroba Dios di kumpli ku e promesanan aki ni ningun di su otro promesanan alentador.

E manera ku Dios lo trese e bendishonnan aki ta mediante su Reino. Den e Orashon di Nos Tata, Hesukristu a siña su siguidónan pa resa i pidi pa e Reino aki bin i pa Dios su boluntat sosodé “na tera meskos ku den shelu.” (Mateo 6:9, 10) Pronto, bou di e Reino aki, ningun hende riba tera lo no sinti nan motivá pa kometé krímen pa motibu di pobresa, opreshon ni egoismo. Na lugá di esei, e Palabra di Dios ta bisa: “Lo tin abundansia di maishi den e tera, riba kabes di e serunan.” (Salmo 72:16) Sí, Yehova Dios lo proveé un abundansia interminabel di kosnan bon pa tur hende riba tera. Mas importante ainda, hende lo hasi kos motivá dor di amor pa Dios i nan próhimo, i nunka mas mundu lo wòrdu afligí pa krímen.