“Mi A Haña Amistat, Amor i Atenshon”

“NA ESAKI tur hende lo sa ku boso ta mi disipel, si boso tin amor un pa otro.” (Juan 13:35) Manera Hesus a bisa, amor a bira e marka di identifikashon di e hermandat kristian di promé. Tertuliano, kende a skirbi mas ku shen aña despues di e morto di Kristu, a sita loke opservadónan a bisa: ‘Mira kon nan ta stima otro i kon nan ta asta dispuesto pa muri pa otro.’

Ainda ta posibel pa haña e klase di amor ei den mundu? Sí. Tuma por ehèmpel, un karta ku e ofisina di sukursal di Testigunan di Yehova na Brazil a risibí. Un señora ku yama Marília a skirbi:

“Tempu ku mi mama, ku ta un Testigu di Yehova, tabata biba na Villa Mercedes, Argentina, el a haña artrítis degenerativo ku a lag’é keda lam di su hep bai abou. Durante e promé ocho lunanan di su enfermedat, ta e Testigunan na Villa Mercedes a kuid’é ku amor i interes. Tur kos nan a hasi p’e. Nan a limpia su kas, kushiná p’e, i asta ora e tabata den hospital, Mama semper tabatin un hende kuné, di dia i anochi.

Entretantu ami ku Mama a bolbe Brazil bèk, kaminda te ainda e ta rekuperando di su malesa. E Testigunan ku tin kaminda nos ta biba awor ta hasi tur loke nan por pa yuda Mama rekuperá.”

Marília ta konkluí su karta: “Mi tin ku bisa sí ku mi mes no ta un Testigu, pero mi a haña amistat, amor i atenshon serka e Testigunan.”

Sí, ainda tin hende ku ta hasi kos motivá pa berdadero amor kristian. Ora nan hasi esei nan ta demostrá kuantu poder e siñansanan di Hesus por tin riba bida di hende.