Pregunta di Lektor

Na ken Yehova a referí ora el a bisa “un di nos” na Génesis 3:22?

Ta parse ku Yehova Dios a referí na su mes i na su Yu unigénito ora el a bisa: “E hòmber a bira manera un di nos, konosiendo bon i malu.” (Génesis 3:22) Laga nos wak dikon.

Yehova a ekspresá e palabranan aki despues ku el a dikta sentensia pa e promé pareha humano. Algun hende a komprondé ku e ekspreshon “un di nos” ta un forma plural pa referí na mahestat. Un ehèmpel di esaki ta ora un rei humano bisa “nos no ta kontentu,” ounke e ta referí na su mes persona so. Sin embargo, relashoná ku Génesis 1:26 i 3:22, e eksperto di Beibel Donald E. Gowan a bisa: “No tin ningun prueba den e T[èstamènt] B[ieu] pa mayoria splikashon ku hende ta duna: ‘nos’ pa indiká mahestat, . . . òf pa indiká ku tin mas ku un persona den un Dios. . . . Ningun di e splikashonnan aki no ta lógiko den kaso di Génesis 3:22, ya ku aki e ta papia di ‘un di nos.’”

Ta posibel ku Yehova a referí na Satanas e Diabel, kende a kuminsá disidí pa su mes kiko ta “bon i malu,” i a influensiá e promé humanonan pa hasi e mesun kos? Esei no ta lógiko. Aki Yehova a usa e ekspreshon “un di nos.” Satanas no tabata forma parti mas di e multitut di angelnan fiel di Yehova, pues lo e no por a wòrdu inkluí entre esnan ku tabata na Yehova su banda.

Ta na e angelnan fiel Dios tabata referí? Nos no por bisa sigur-sigur. Sin embargo, e similaridat entre e ekspreshonnan na Génesis 1:26 i 3:22 ta duna nos un idea. Na Génesis 1:26, nos ta lesa ku Yehova a bisa: “Laga nos traha hende segun nos imágen, konforme nos semehansa.” Ta ku ken e tabata papia? Refiriendo na e kriatura spiritual ku a bira e hòmber perfekto Hesus, apòstel Pablo a bisa: “E ta e imágen di e Dios invisibel, e primogénito di henter kreashon. Pasobra pa medio di dje tur kos a wòrdu kreá, tantu den e shelunan komo riba tera.” (Kolosensenan 1:15, 16) Sí, ta parse lógiko ku na Génesis 1:26, Yehova tabata papia ku su Yu unigénito, e “trahadó eksperto,” ku tabata huntu kuné durante kreashon di shelu i tera. (Proverbionan 8:22-31) E similaridat den e ekspreshon na Génesis 3:22 ta duna indikashon ku Yehova atrobe tabata papia ku esun ku tabatin un relashon mas será kuné, su Yu unigénito.

Aparentemente Dios su Yu unigénito tabatin konosementu di “bon i malu.” Dor ku el a pasa un periodo di tempu asina largu huntu ku Yehova i tabatin un relashon íntimo kuné, sigur e lo a siña bon-bon ta kua ta e pensamentu-, prinsipio- i normanan di su Tata. Podisé ta dor ku Yehova tabata konvensí ku su Yu tabata na haltura di e kosnan aki i ku lo e keda leal na nan, Yehova a dun’é un sierto grado di libertat pa trata ku asuntunan sin ku Hesus mester a konsultá direktamente kuné den kada situashon ku presentá. Pues te na e grado aki e Yu lo tabatin outorisashon i kapasidat pa determiná kiko ta bon i malu. Sin embargo, kontrali na Satanas, Adam i Eva, Hesus sí no a establesé un norma ku ta na konflikto ku esun di Yehova.