Berdadero Yudansa pa Hende Pober

ORA Hesukristu, e Yu di Dios, tabata riba tera, el a mustra berdadero interes den yuda hende pober. Relashoná ku Hesus su ministerio, un hende ku a mir’é personalmente a bisa: “E siegunan ta mira, e lamnan ta kana, e leprosonan ta wòrdu hasí limpi, i e surdunan ta tende, e mortonan ta wòrdu lantá i na e pobernan e evangelio [òf, bon notisia] ta wòrdu prediká.” (Mateo 11:5) Pero kiko di e miónes i miónes di hendenan pober djawe? Tin un bon notisia pa nan? Sí, tin un mensahe di speransa!

Maske hopi bes mundu en general ta pasa por haltu di hende pober i ta ignorá nan, e Palabra di Dios ta primintí: “Esun den nesesidat lo no keda lubidá pa semper; tampoko e speransa di esnan afligí lo no peresé pa semper.” (Salmo 9:18) E palabranan di konsuelo aki lo haña nan kumplimentu ora e Reino di Dios, un berdadero gobièrnu den shelu, remplasá tur gobièrnu humano. (Daniel 2:44) Komo Rei di e gobièrnu selestial ei, Hesus “lo tin kompashon di e pober i di esun den nesesidat, i e lo salba bida di esnan den nesesidat. E lo reskatá nan bida for di opreshon i violensia; i nan sanger lo ta presioso den su bista.”—Salmo 72:13, 14.

Den ki kondishon hende lo biba ora Kristu ta goberná e tera? Esnan ku ta bai biba bou di Kristu su gobernashon lo benefisiá di e trabou ku nan ta hasi. Beibel ta bisa na Mikeas 4:3 i 4: “Kada un di nan lo sinta bou di su palu di wendrùif i bou di su palu di figu, i ningun hende lo no spanta nan, pasobra e boka di e SEÑOR di ehérsitonan a papia.” E Reino di Dios lo eliminá malesa i morto. (Isaias 25:8) Esei sí lo ta un mundu diferente! Nos por kere e promesanan bíbliko aki, pasobra nan ta inspirá pa Dios mes.

Ademas di duna un mensahe di speransa, Beibel ta yuda nos trata problema ku éksito. Por ehèmpel e ta yuda hende vense falta di rèspèt propio ku kisas pobresa a kousa. Kristiannan ku ta den nesesidat a siña for di Beibel ku nan ta mes presioso den bista di Dios ku kristiannan riku. E buki bíbliko di Jòb ta bisa ku Dios “no ta duna preferensia na prensnan, ni ta duna e riku mas atenshon ku e pober, pasobra nan tur ta obra di su mannan.” (Jòb 34:19) Dios ta stima ámbos mes tantu.—Echonan 10:34, 35.