Konsuelo pa Esnan Ku Ta Sklama pa Yudansa

BEIBEL no ta un guia pa salú mental. Sin embargo, e ta duna nos konsuelo i ta yuda nos apresiá bida apesar di e problemanan ku nos ta konfrontá. E Skritura ta bisa na un manera realista: “Hende ku a nase di muhé ta biba poko dia i ta yen di problema.” (Jòb 14:1) Nos propio imperfekshon ta responsabel pa algun di nos pruebanan. Pero ken ta prinsipalmente responsabel pa sufrimentu humano?

Beibel ta identifik’é komo un spiritu malbado ku yama Diabel i Satanas. E ta “gaña henter mundu” i ta kousa hopi di e problemanan ku ta tormentá humanidat. Sin embargo, Beibel ta bisa nos tambe ku su tempu ta kabando. (Revelashon 12:9, 12) Pronto Dios lo intervení pa pone un fin na tur e angustia ku Satanas ta trese riba e habitantenan di tera. Segun Beibel, e mundu nobo di hustisia ku Dios a primintí lo pone fin na miseria i desesperashon.—2 Pedro 3:13.

Ta un gran konsuelo pa sa ku sufrimentu humano ta algu temporal! Bou di gobernashon di Dios su Reino selestial den man di Hesukristu, lo no tin inhustisia ni sufrimentu mas. E Skritura ta deklará relashoná ku Dios su Rei nombrá: “E lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é. E lo tin kompashon di e pober i di esun den nesesidat, i e lo salba bida di esnan den nesesidat. E lo reskatá nan bida for di opreshon i violensia; i nan sanger lo ta presioso den su bista.”—Salmo 72:12-14.

E tempu pa e palabranan profétiko aki kumpli ta masha serka. Nos lo por gosa di bida eterno den un paradeis riba tera bou di kondishonnan maravioso. (Lukas 23:43; Juan 17:3) Konosementu di e bunita promesanan bíbliko aki ta duna speransa i konsuelo na esnan ku ta sklama pa yudansa.

[Plachi na página 32]

Mucha muhé tristu: Photo ILO/J. Maillard