Amor Ta Indispensabel
NO TA importá edat, kultura, idioma òf rasa; tur hende tin un hamber pa amor. Si nan no satisfasé e hamber ei, nan no ta felis. Un investigadó médiko a skirbi: “Amor i relashonnan íntimo ta e kousa fundamental di loke ta hasi nos malu i loke ta hasi nos bon, di loke ta okashoná tristesa i loke ta trese felisidat, di loke ta pone nos sufri i loke ta hiba na kurashon. Si un remedi nobo tabatin e mesun impakto, anto práktikamente tur dòkter di nos pais lo a rekomend’é na nan pashèntnan. Un dòkter ku no skirbi un resèpt p’e lo ta masha negligente.”
No opstante, sosiedat moderno, spesialmente su medionan di komunikashon i su figuranan popular ku hende gusta imitá, hopi bes ta pone mas énfasis riba rikesa, poder, fama i sèks ku riba e nesesidat ku hende tin di relashonnan kaluroso i amoroso. Hopi edukadó ta boga pa sigui metanan materialista i un karera den bida. Pa nan, un persona eksitoso ta unu ku a logra un bon posishon den sosiedat. Ta bèrdat ku edukashon i desaroyo di talentonan ta importante, pero bo mester bai asina siegamente tras di nan ku no ta sobra tempu pa amigu i famia? Un eskritor bon eduká di hopi tempu pasá i kende a studia naturalesa humano a fondo, a kompará un persona talentoso pero sin amor ku un “gòng ku ta zona òf un simbal ku ta resoná.” (1 Korintionan 13:1) Hende asina por bira riku, asta famoso, pero nunka berdaderamente felis.
Hesukristu, kende tabatin un komprondementu profundo di hende i un kariño masha spesial pa nan, a duna amor pa Dios i pa próhimo e lugá sentral den su siñansa. El a bisa: “Stima SEÑOR bo Dios ku henter bo kurason, i ku henter bo alma, i ku henter bo mente. . . . Stima bo próhimo manera bo mes.” (Mateo 22:37-39) Ta solamente esnan ku sigui e palabranan aki lo ta berdadero siguidó di Hesus. P’esei, el a bisa: “Na esaki tur hende lo sa ku boso ta mi disipel, si boso tin amor un pa otro.”—Juan 13:35.
Pero kon bo ta kultivá amor den e mundu djawe? I kon mayornan por siña nan yunan mustra amor? E siguiente artíkulo lo kontestá e preguntanan aki.
[Plachi na página 3]
No ta fásil pa kultivá amor den un mundu golos pa kos