Pregunta di Lektor

Satanas e Diabel por lesa hende su mente?

Maske nos no por ta apsolutamente sigur tokante e asuntu, ta parse ku ni Satanas ni su demoñonan no por lesa nos pensamentu.

Pensa un ratu riba e nòmbernan deskriptivo ku Satanas a haña. E ta wòrdu yamá Satanas (Resistidó), Diabel (Kalumniadó), Kolebra (sinónimo di Engañadó), Tentadó i Gañadó. (Jòb 1:6; Mateo 4:3; Juan 8:44; 2 Korintionan 11:3; Revelashon 12:9) Ningun di e nòmbernan deskriptivo aki ta indiká ku Satanas tin e abilidat di lesa mente.

Pero na kontraste, Yehova Dios sí ta wòrdu deskribí komo esun ku “ta sondia kurason.” (Proverbionan 17:3; 1 Samuel 16:7; 1 Krónikanan 29:17) Hebreonan 4:13 ta bisa: “No tin ningun kriatura skondí pa [Yehova] su bista, ma tur kos ta habrí i bisto dilanti di wowo di esun ku nos tin di haber kuné.” Nada straño anto ku Yehova a duna su Yu, Hesus, e abilidat di sondia òf saminá kurason. Hesus resusitá a deklará: “Ami ta esun ku ta saminá mente i kurason; i lo mi duna kada un di boso segun boso obranan.”—Revelashon 2:23.

Beibel no ta bisa ku Satanas por sondia hende su mente i kurason. Esaki ta importante, ya ku apòstel Pablo ta sigurá nos ku “[Satanas] su trikinan no ta deskonosí” pa kristiannan. (2 Korintionan 2:11) Pues, nos no tin nodi sinti miedu ku Satanas tin sierto abilidat ekstraordinario ku nos no sa mes di dje.

No opstante, esaki no kier men ku nos Atversario no por diserní kiko ta nos debilidatnan. Satanas tabatin siglonan pa studia komportashon humano. E no tin nodi lesa mente pa diserní ki patronchi di komportashon nos tin, pa opservá ki dibertishon nos lo buska, òf pa skucha di kiko nos ta papia, etcetera. Nos ekspreshon di kara i nos lenguahe di kurpa tambe por duna un idea ta kiko nos ta pensa òf sinti.

Pero en general, ainda Satanas ta usa e mesun trikinan ku el a usa den hòfi di Edén: mentira, engaño i informashon robes. (Génesis 3:1-5) Maske kristiannan no mester tin miedu ku Satanas lo lesa nan mente, nan tin motibu pa ta preokupá tokante ki pensamentunan Satanas ta purba hinka den nan mente. E kier pa kristian bira hende ku “mente korupto i privá di e bèrdat.” (1 Timoteo 6:5) Nada straño ku e mundu di Satanas ta bombardiá nos ku informashon i dibertishon korupto. Pa resistí e atake aki, kristiannan mester protehá nan mente dor di bisti “e hèlm di salbashon.” (Efesionan 6:17) Nan ta hasi esaki dor di yena nan mente ku bèrdatnan di Beibel i evitá kontakto innesesario ku mal influensianan di e mundu di Satanas.

Satanas ta un enemigu poderoso. Pero nos no mester tin un miedu eksagerá p’e ni pa su demoñonan. Santiago 4:7 ta sigurá nos: “Resistí Diabel i e lo hui for di boso.” Si nos sigui e konseho aki, nos lo por bisa meskos ku Hesus, ku Satanas no tin dominio riba nos.—Juan 14:30, NW.